Тадбиркорлик ҳуқуқи (махсус қисм)

Хусусий тадбиркорликни ахборот билан таъминлаш соҳасидаги сиёсат. Иқтисодиётни ислоҳ қилишнинг дастлабки босқичларидаёқ, соҳавий ва маҳаллий бошқарув органларига аҳолининг тадбиркорлик фаолиятига фаол ёрдам кўрсатиш, ўз хўжалик ташаббускорлигини амалга ошириш, товар ишлаб чиқарувчилар ва тадбиркорлар Палатасига уларнинг устав вазифаларини амалга оширишда ёрдам кўрсатиш топшириғи берилганди. Тадбиркорликни тарғиб қилиш учун ёш тадбиркорларга ёрдам берувчи Ўзбекистон Республикаси Ассоциациясини тузиш ташаббуси қўллаб-қувватланди.
Ўзбекистон Республикаси Давлат телерадиокомпаниясига тадбиркорлик фаолияти асосларини ўқитишга бағишланган теларадио кўрсатув ва эшиттиришлар ва ўқув дастурларини тайёрлаш топшириғи юкланган. Давлат матбуот қўмитаси, Ўзбекистон Ресубликаси Алоқа вазирлиги, товар ишлаб чиқарувчилар ва тадбиркорлар Палатасига палатанинг даврий нашрини тарғибот, реклама ва тадбиркорлик фаолиятини ривожлантириш билан боғлиқ белгиланган тартибда нашр этиш ҳуқуқига эга матбаа маҳсулотини чоп этиш ва тарқатишда молиявий ёрдам билан таъминлаш топширилган.
Ушбу ҳолат билан боғлиқ равишда Ўзбекистон товар ишлаб чиқарувчилар ва тадбиркорлар Палатасига кичик ва ўрта бизнес корхоналарини қўллаб-қувватлаш бўйича тадбирни бошқариб туриш вазифаси юкланган ва бу тадбирларни «Бизнес-Фонд», «Мадад» суғурта агентлиги ва Ўзтадбиркорбанк амалга ошириши кўзда тутилган.
Ўзбекистон Товар ишлаб чиқарувчилар ва тадбиркорлар Палатасига ҳудудий Палаталар қошида кичик ва ўрта бизнесни ахборот маслахат бўйича қўллаб-қувватловчи хўжалик ҳисобидаги марказлар тузиш топширилган ва бу марказларга қуйидаги вазифалар юкланган:
-тадбиркорлик соҳасидаги дастурлар ва лойиҳаларни жадал амалга ошириш учун тадбиркорлик субъектларини иқтисодий, ҳуқуқий ишлаб чиқариш-технология ва бошқа зарур ахборот билан таъминлаш;
-кичик ва ўрта бизнес субъектларига, хусусий тадбиркорларга таъсис ҳужжатлари, бизнес-режаси, кредит олиш аризасини олишни тайёрлашда, бухгалтерлик иши ва ҳисобини ташкил этишда, аудиторлик текширувини ўтказишда, бошқа турдаги маслаҳат хизматларини кўрсатишда ҳар томонлама ёрдам бериш;
-хусусий тадбиркорлар, кичик ва ўрта бизнес субъектларининг солиқ, молия, банк, суғурта ва бошқа тузилмалар билан ўзаро ҳамкорлигини таъминлаган ҳолда юридик хизмат кўрсатиш.
Тадбиркорликни ривожлантириш давлат сиёсати даражасига кўратилган экан, кичик ва ўрта бизнес ривожини қўллаб-қувватлаш вазифасини амалга ошириш бўйича жавобгарлик барча давлат органлари, кредит-молия муассасалари, суғурта ва нодавлат ташкилотлари зиммасида бўлади. Шундай экан, маҳаллий давлат ҳокимияти раҳбари фаолиятини баҳолаш, унинг кичик ва ўрта бизнес, хусусий тадбиркорликни ривожлантиришга нечоғли ҳисса қўшаётганлигига боғлиқ бўлади.
Тижорат банклари кичик ва ўрта корхоналарга хорижий кредит тармоғини киритиш мақсадида сармоя лойиҳаларини танлаш ва экспертизаси бўйича бепул хизмат кўрсатадилар.