Спорт психологияси 1-маъруза спорт психологиясининг

Асбоб-ускунали усуллар.
Психик тартиблашнинг фақат сўз воситасидаги усуллари айрим ҳолатларда самарасиз бўлиши мумкин. Бунинг асосий сабаблари қуйидагилардан иборат:
а) спортчини ишонтириш қийинлиги;
б) гетеро ёки ауторегуляция (тартиблаш) усулларидан фойдалана олмаслик;
в) сеансни ўтказиш учун шарт-шароитнинг йўқлиги;
г) спортчидаги асаб психик зўриқишнинг сезиларли даражада пастлиги ёки аксинча, ҳаддан зиёд юқорилиги;
д) сўз воситасидаги таъсир усулларининг самарадорлигига ишончсизлик.
Бу ҳолатларда ускуналар воситасидаги қайта тиклаш усуллари яхши ёрдам беради:
1) электроаналгезия услублари ёрдамида уйқуга ўхшаш ҳолатни шакллантириш;
2) электромассаж, электропунктура.
Марказий аналгезия
Марказий аналгезия қайта тиклаш механизмларининг жисмоний асослари шундан иборатки, частоталар бўйича импулсли токларни танлаб таъсир кўрсатиш остида марказий асаб тизимида мия ритмлари депрессиясини тарқатувчи қисмлар шаклланади. (Э.С.Каструбин ҳаммуаллифликда, 1979-йил). Натижада бош мия катта яримшарлари қобиғида ўз-ўзини тартиблаш жараёнлари учун кулай шароит яратилади, турли стресс ҳолатларида организмнинг ҳаёт учун муҳим бўлган қисмларининг нейровегетатив ҳимояси таъминланади. (В.П.Некрасов, Н.А.Худадов)
Марказий аналгезия учун ПЭЛАНА (электроаналгезия ускунаси) ёки ЛЭНАР (даволаш электронаркози), шунингдек (ДЗЕН-ТРЕНЕР) каби саноат ускуналаридан фойдаланилади. Улар импулсларни 500-1200Гц (ПЭЛАНА) ва 500-2000Гц (ЛЭНАР) гача ҳаракатга келтиради.
Марказий аналгезияни қўллаш қайта тиклашнинг вербал усуллари ва вибрацион массаж (махсус массаж курсида) билан қўшиб олиб борилганда янада яхшироқ самара беради.
Электромассаж. Ушбу атама остида турли мушак гуруҳларига унча кучли бўлмаган ток орқали имлульс таъсир кўрсатиш усуллари комплекси тушунилади (бунда ток кучи 650 мкА дан ошмаслиги керак).
Электропунктура терининг электроактив қоплами нуқталарига кучсиз доимий ток билан таъсир кўрсатиш ва рағбатлантиришдан иборатдир. Ушбу нуқталарни топиш махсус атласлар ва ушбу тана қисмлари терисининг қаршилигини ўлчовчи асбоблар ёрдамида аниқланади. Терининг электрфаол нуқталарига таъсир кўрсатиш марказий ва вегетатив асаб тизимидаги қўзғалувчанлик ва тормозланиш дисбалансини бартараф этишга ёрдам беради.(А.Л. Попов. 1988 йил.)