Ma’ruza №3 Mavzu: Mashg‘ulotlar jarayonida sportchilar tayyorgarligining asosiy bo‘limlari

Texnika natijaviyligi. U sportchi texnikasining samaradorligi, barqarorligi, variativligi, tejamkorligi va raqib uchun minimal taktik informativligi bilan aniqlanadi.

Texnika samaradorligi. Uni hal etilayotgan vazifalarga va yuksak oxirgi natijalarga mosligi hamda jismoniy, texnik, ma’naviy – ruhiy tayyorlanganlik darajasiga mosligi bilan aniqlanadi.

Texnika barqarorligi esa uni xalaqit beruvchi omillarga nisbatan mustahkamligi, sharoitlarga va sportchining funksional holatiga nisbatan mustaqilligi bilan bog‘liq. Zamonaviy mashg‘ulot va ayniqsa musobaqa faoliyati ko‘p sonli xalaqit beruvchi omillar bilan xarakterlanadi. Ular qatoriga raqiblarning faol qarshilik ko‘rsatishlari, tobora o‘sib boruvchi charchash, hakamning g‘ayrioddiy qarori, g‘ayrioddiy musobaqa o‘tkazish joyi, qurilmalar va uskunalar, ishqibozlarning xayrixohlik ruhida bo‘lmagan xulq – atvori va boshqalar kiradi. Sportchining murakkab sharoitlarda samarali usullarni va harakatlarni bajarish qobiliyati barqarorlikning asosiy ko‘rsatkichi hisoblanadi hamda ko‘p jihatdan uning texnik tayyorlanganlik darajasini aniqlab beradi.