Ma’ruza №3 Mavzu: Mashg‘ulotlar jarayonida sportchilar tayyorgarligining asosiy bo‘limlari

Jismoniy tayyorgarlik.

Jismoniy tayyorgarlik – bu jismoniy sifatlarni tarbiyalashga va tayyorgarlikning barcha tomonlarini takomillashtirish uchun qulay sharoitlar yaratadigan funksional imkoniyatlarni rivojlantirishga yo‘naltirilgan pedagogik jarayondir. U umumiy va maxsus jismoniy tayyorgarlikka bo‘linadi.

Umumiy jismoniy tayyorgarlik jismoniy sifatlarni, funksional imkoniyatlarni va sportchi organizmi tizimlarini hartomonlama rivojlantirishni nazarda tutadi. Zamonaviy sport trenirovkasida umumiy jismoniy tayyorlanganlik umuman hartomonlama jismoniy kamolot bilan emas, balki aniq sport turida sport yutuqlariga va trenirovka jarayoni samaradorligiga bilvosita ta’sir o‘tkazadigan sifat va qobiliyatlarni rivojlanish darajasi bilan bog‘lanadi. Sportchining organizmiga va shaxsiga umumiy ta’sir ko‘rsatadigan jismoniy mashqlar umumiy jismoniy tayyorgarlik vositalari hisoblanadi. Ular qatoriga turli harakatlanishlar – yugurish, chang‘ida yurish, suzish, harakatli va sport o‘yinlari, qo‘shimcha og‘irlik bilan bajariladigan mashqlar va boshqalar kiradi.

Umumiy jismoniy tayyorgarlik butun yillik trenirovka sikli davomida amalga oshirilishi kerak.