Глоссарий абсолют монархия

САНКЦИЯ - диспозицияда кўрсатилган қоидани бузган шахсга нисбатан давлат органи қўллаши мумкин бўлган таъсир чорасини белгилайди. Санкция ҳуқуқ нормасининг бир қисми бўлиб, унда диспозицияда кўрсатилган талабларни бажармаганлик учун берилиши мумкин бўлган жазонинг ёки тавсия этилган ҳаракатни содир этганлик учун рағбатлантиришнинг тури ва ўлчови ифодаланган бўлади.
СЕНАТ (лот. “senex” - оқсоқол, оқсоқоллар кенгаши) - Ўз.Рда Сенат қонун чиқарувчи ҳокимият органи - ЎзР Олий Мажлисининг юқори ва ҳудудий вакиллик палатаси ҳисобланади ҳамда ЎзР Конституцияси ва “Ўзбекистон Республикаси Олий Мажлисининг Сенати тўғрисида”ги Ўз.Р конституциявий қонуни асосида фаолият кўрсатади. С. аъзолари (сенаторлар) Қорақалпоғистон Республикаси Жўқорғи Кенгеси, вилоятлар, туманлар ва шаҳарлар давлат ҳокимияти вакиллик органлари депутатларининг тегишли қўшма мажлисларида мазкур депутатлар орасидан яширин овоз бериш йўли билан Қорақалпоғистон Республикаси, вилоятлар ва Тошкент шаҳридан тенг миқдорда – олти кишидан сайланади. Ўзбекистон Республикаси Олий Мажлиси Сенатининг 16 нафар аъзоси фан, санъат, адабиёт, ишлаб чиқариш соҳасида ҳамда давлат ва жамият фаолиятининг бошқа тармоқларида катта амалий тажрибага эга бўлган ҳамда алоҳида хизмат кўрсатган энг обрўли фуқаролар орасидан Ўзбекистон Республикаси Президенти томонидан тайинланади. Сайлов куни 25 ёшга тўлган ҳамда камида беш йил Ўзбекистон Республикаси ҳудудида муқим яшаётган Ўзбекистон Республикаси фуқароси Сенат аъзоси бўлиши мумкин.
Сенат - 1. АҚШ, Франция, Италия, Бразилия, Польша, Руминия, Чехия, Австралия, Бельгия, Канада, Испания, Венесуэла, Колумбия, Доминикан Республикаси, Ўзбекистон Республикаси ва айрим бошқа давлатларда парламентнинг юқори палатаси номи. 2. Айрим мамлакатларда давлат бошқаруви юқори органининг номи (мас. Берлин сенати). 3. Айрим мамлакатларда (қоидага кўра) олий суд таркибидаги бўлимлар номи, масалан, ГФР Федерал Конституциявий судининг Сенати.
СИЁСИЙ ПАРТИЯ - ўз аъзолари ва тарафдорларининг сиёсий иродасини ифода этадиган, шу давлат сиёсий йўналишини белгилашда, давлат ҳокимият органларини шакллантиришда, шунингдек, ҳокимиятни ўзининг вакиллик ҳокимият органларига сайланган вакиллари орқали амалга оширишда иштирок этишни ўзига вазифа қилиб олган барқарор тузилмага ва доимий фаолият характерига эга бўлган мустақил ижтимоий бирлашма. Партиянинг аниқ юридик таърифи муайян давлатлар қонунчилигида берилади ва улар маҳаллий сиёсий ва ҳуқуқий анъаналарга кўра жиддий фарқланиши мумкин.