Баҳодир эгам

2021 йил, 2 май.




ЗУЛФИЯ МОМО 

Момо Ҳаво наслидан Зулфия момо,

Сиз вафо тимсоли Зулфия момо.
Сизнинг ашъорингиз элларда достон,
Биз ҳам ёд олурмиз Сизни доимо.

“Уруш! Номинг ўчсин!” деган эдингиз,

Тинчлик бўлсин, дея дуо қилдингиз.
Бугун юртим обод, тинчлик барқарор,
Ижобат бўлгайдир дуоларингиз.


2018 йил.


БАХТНОМА 

Жон қизим, Оллоҳ берган омад қутлуғ, бахт қутлуғ,

Тўй-тантана, гўшанга-ю гўзал тожу тахт қутлуғ.

Бу кунларга шукрона айт, ким етган, ким етмаган,

Қайси жувон бу кунларни орзу ҳавас этмаган?

Сенга атаб безатмишлар уй эмас, кошоналар,

Ҳавас билан қарашмоқда дугоналар, оналар.

Бу кошона сенинг уйинг палак ёзиб, илдиз от,

Ҳамма ҳавас қилгудайин оилани эт бунёд.

Алпомишдай ўғиллигу Барчинойдек қизларинг

Ўз юртига содиқ бўлиб, мангу қолсин изларинг.
Ўзбекона лутф бўлсин ҳар бир айтган сўзингда,
Яхши хислат, фазиларлар безак бўлсин ўзингга.

Жоним қизим, Оллоҳ сенга берди ақлу заковат,

Сен ҳам унга шукур айлаб, этгил хайру саховат.

Меҳмон келса гар уйингга мезбонлигинг адо қил,

Инсонийлик инсонга хос, ўзни шунга фидо қил

Ота-она омонатдир, қилиб тургин зиёрат,

Билсанг, шудир ибодатлар ичра асл ибодат.

Озода-ю пазанда бўл ҳамда ҳунарли пеша,

Қовоғингни осиб юрма, кулиб тургин ҳамиша.

Эринг топган ҳар бир сўмни тежаб-тергаб яратгин,

Табассум-ла кутиб олиб, кўзларини яйратгин.

Бошингга нур сочаётган қуёшингга, ойингга,

Шукур қилсанг, омад ва бахт турар сенинг пойингда.

Ўзинг тузган давлатингда маликадек яйраб юр,

Сенинг учун куйиб-ёнган Зулхуморни эслаб тур!


ОНАМГА ЎХШАГИН 

Кўзларида ибо бор эди,

Юзда шарм, ҳаё бор эди,
Сўзда ҳикмат, дунё бор эди,
Сен онамга ўхшагин, қизим!

Меҳнат қилиб толмас эдилар,

Арз, шикоят, нолимас эдилар,
Ёмон назар солмас эдилар,
Сен онамга ўхшагин, қизим!

Исторали эди юзлари,

Оҳ, мулойим эди сўзлари,
Кулиб турар эди кўзлари,
Сен онамга ўхшагин, қизим!
Тоат, ибодатли эдилар,
Сабр-қаноатли эдилар,
Хайру саховатли эдилар,
Сен онамга ўхшагин, қизим!

Келгандайин уйимга онам,

Бахтга тўлиб кетсин кошонам,
Жоним қизим, меҳрибон онам,
Сен онамга ўхшагин, қизим!
ШАРАФЛАЙМАН

Мен касбимни шарафлайман,

Китоб – менинг жонимдир.
Кутубхонам улуғ даргоҳ,
Меҳнат – шараф-шонимдир.

Ким китобни улуғласа,

Етар асл муродга.
Кимки уни хор айласа
Қолур шаксиз уятга.

Ҳаёт йўлинг ёритгувчи

Машъаладир шу китоб.
Онг, шуурни бойитгувчи
Масаладир шу китоб.

Китобнинг ҳар сабоғини

Жойлагайман юракка.
Ватанимиз байроғини
Кўтаргайман юксакка.

Мен касбимни шарафлайман,

Китоб – менинг жонимдир.
Кутубхонам улуғ даргоҳ,
Эътиқод – иймонимдир!