Баҳодир эгам

ХУШ КЕЛДИНГ 

(Набирамга)

Бунёдга келдингми жажжи, оппоғим,
Уйимни ёритган шамси чароғим,
Шириним, фариштам, асал дўмбоғим,
Хуш келдинг дунёга ҳур чақалоғим,
Билсанг, сен ҳаммадан зўр, чақалоғим!

Суюнчи беринг, деб чопар болалар,

Қовурдоқ пиширар амма, холалар,
Бешиклар безатиб айтар аллалар,
Хуш келдинг дунёга ширин дўмбоғим.

Боболар, бувилар қўли дуода,

Бўлсин дер боламнинг умри зиёда,
Ғам, андуҳ, ҳасратни кўрма дунёда,
Хуш келдинг дунёга зўр чақалоғим.

Отангнинг меҳнатга чоғлаган сенсан,

Онангни яшнатиб, соғлаган сенсан,
Оила риштасин боғлаган сенсан,
Умринг узоқ бўлсин асал дўмбоғим,
Ризқинг бутун бўлсин шамсу чароғим!




ЎҒЛИМГА

Оллоҳ сизни хўп сийлаган,

Полвон қилиб яратган.
Оилага бошу раҳбар,
Қўрғон этиб яратган.

Ҳаддингизни билиб юринг,

Оилага бош бўлиб.
Майда-чуйда гапдан йироқ,
Суянчиқ, сирдош бўлиб.

Рўзғор юки жуда оғир,

Ташлаб қўйманг аёлга.
Аёл зоти нозик хилқат,
Қолманг иснод, уволга.

Аёлингни авайласанг

Ҳар корингга ярайди.
Ошу-овқат, бола-чақа,
Рўзғорингга қарайди.

Агар уни сева олсанг

Ёниб турар кўзлари.
Яхши сўзлаб, йўлга солсанг
Сарғаймайди юзлари.

Соғлом она – соғлом бола

Келтиради дунёга.
Ҳаётинг ҳам гуллаб, яшнаб
Тўлар бахту зиёга.

Аёлга кўп нарса эмас,

Рағбат керак, бахт керак.
Садоқатли, вафоли ёр,
Хушхулқу хушвақт керак.


КЕЛИНИМГА 

Барча панду насиҳатни

Мен онамдан уққанман.
Не-не орзу ҳавас билан
Болаларни боққанман.

Мана, бугун катта бўлиб

Топиб кетди йўлини.
Еб-ичириб, ювиб-тараб
Тўғри қилдим қўлини.

Келинпошша, тингланг энди

Айтай оҳу зоримни.
Қўлингизга топширяпман
Алп қомат шунқоримни.
Оллоҳ доим сизга берсин
Сабр, чидам, тоқатни.
Болагинам хуш кўради
Ширин, тансиқ овқатни.

Уст-бошига қараб қўйинг,

Абгор бўлиб юрмасин.
Ширинсухан суҳбат қуринг,
Қовоғини ўймасин.

Ота-онанг ёмон, дея

Яқинлардан бездирманг.
Сал кўнглингиз ранжиса ҳам
Унга асло сездирманг!
Асабини бузманг асло,
Қўлга “қурол” олмасин.
Сизга зарда қиламан, деб
Касал бўлиб қолмасин.

Эр – бош эрур, хотин – бўйин,

Буни яхши биласиз.
Энди болам, қўлингизга
Не келса сиз қиласиз.

Мен биламан, сиз аслида

Асил инсон боласи.
Сиз боламни авраб, асраб
Тўғри йўлга соласиз.

Шундай бўлса мен ҳам сизни

Дуо қилиб тураман.
Келиниммас, қизим дея
Сизни яхши кўраман.