Баҳодир эгам

АСРАСИН 
Барча дарду балолардан,
Ғийбат, ҳасад, ғавғолардан,
Ҳою ҳавас савдолардан,
Эътиқодсиз дунёлардан
Аллоҳ ўзи асрасин.
Илло сенга сажда қилдим, ўғил бердинг, қиз бердинг,
Эл олдида эҳтирому ҳамда ёруғ юз бердинг,
Саломатлик, ақл-идрок, насиба-ю рисқ бердинг,
Эътиборсиз дунёлардан Оллоҳ ўзи асрасин.

Бу дунёда орттирганим – барча дўсту ёрларим,

Фарзандларим – истиқболим ҳамда номус, орларим,
Жигарларим – суянч тоғим, йўқотганим, борларим,
Оқибатсиз дунёлардан Оллоҳ ўзи асрасин.

Ҳавас қилса арзигулик омад бердинг, бахт бердинг,

Оилада бекалик, гўзал тожу тахт бердинг,
Садоқатли, вафоли ёр – хушхулқу хушвақт бердинг,
Муҳаббатсиз дунёлардан Оллоҳ ўзи асрасин.

Яна сенга зикр қилдим, шукур қилдим минг бора,

Ўзинг ҳоқон, ўзинг султон, ўзинг топгувчи чора,
Илтижо-ю дуоларим етсаки сенга зора,
Юртим асра, эй Оллоҳим заминимиз асрагин!
БОЛАМ, ДЕБ... 

Суюкли набирам онаси,

Боламнинг тақдир пешонаси,
Келганда айтайлик хонаси –
Келинни болам, деб асрайлик.

Ёш ниҳол токи у унгунча,

Ҳовли-ю хонага кўнгунча,
Сувимиз лойланиб тингунча
Келинни болам, деб асрайлик.

Сиз менга келинмас, қизим денг,

Бўлингиз ҳотамтой, бағри кенг,
Ҳамиша ўзингизга кўринг тенг,
Келинни болам, деб асрайлик.

Сизда кўп тажриба, қўллангиз,

Яхши амаллар сари йўллангиз,
Оила – муқаддас, билсангиз,
Келинни болам, деб асрайлик.

Очилиб, сочилиб яшасин,

Бахтидан қувониб яшнасин,
Пойингизга гуллар тўшасин,
Келинни болам, деб асрайлик.

Улар ёш, ажралиб кетмасин,

Етимлар уволи тутмасин,
Болангиз бахтини ютмасин,
Келинни болам, деб асрайлик.

Келин ҳам бировнинг боласи,

Кўксида ўстирган лоласи,
Кўзидан оқмасин жоласи,
Келинни болам, деб асрайлик.