Баҳодир эгам

ЭР КЕЛГАНДА ... 

Халқимизда нақл бор,

Фикр ила ақл бор,
Ҳар гапга қил эътибор,
Унда бўлу бунда бўл,
Эр келганда уйда бўл!

Ораста кийимда бўл,

Кўриб, кўзлари ёнсин.
Маънили суҳбатда бўл,
Тинглаб қалби қувонсин.
Унда бўлу бунда бўл,
Эр келганда уйда бўл!

Дамлаб қўйгил чойини,

Тўшаб бериб жойини,
Тавоф айла пойини,
Унда бўлу бунда бўл,
Эр келганда уйда бўл!

Зориқтирма онангни,

Меҳмон қил дугонангни,
Парваришла болангни,
Унда бўлу бунда бўл,
Эр келганда уйда бўл!

Яна ипин узмасин,

Қизларга кўз сузмасин,
Нохуш режа тузмасин,
Унда бўлу бунда бўл,
Эр келганда уйда бўл!
Ҳеч бир жойда уйдаги
Роҳатини топмасин.
Гулдай рўзғори қолиб
Жононларга чопмасин.
Унда бўлу бунда бўл,
Эр келганда уйда бўл!

Бахтли ҳаёт кўринглар,

Давру даврон суринглар,
Мени эслаб туринглар,
Унда бўлу бунда бўл,
Эр келганда уйда бўл!


ХАБАРДОР БЎЛИНГ

Жигар деганлари асли рост экан,

Жигарлар, билсангиз асл дўст экан,
Юрагига санчмайин тикан
Жигарлардан хабардор бўлинг!

Бир қориндан талашиб тушган,

Опичлаган, эркалаб қучган,
Доим меҳри юракка кўчган –
Жигарлардан хабардор бўлинг!

Болаларнинг йўллари бўлак,

Улфатларга мансабинг керак,
Улар томон уради юрак –
Жигарлардан хабардор бўлинг!

Борганингда тўлади уйи,

Сизсиз ўтмас маърака, тўйи,
Сизсиз фахри, сизсиз обрўйи,
Жигарлардан хабардор бўлинг!
Гоҳ қизғаниб маккор аёлинг
Бузса сенинг ногоҳ хаёлинг,
Ночор, забун бўлмай аҳволинг –
Жигарлардан хабардор бўлинг!

Улар ожизалар, ҳиммати борлар,

Мусофир маконда меҳрингга зорлар,
Ҳамма интиқиб, бағрига чорлар,
Жигарлардан хабардор бўлинг!

Ота ҳовлингизни айлангиз обод,

Ота-она руҳин қилиб шод,
Фароғатда яшанг умрбод,
Жигарлардан хабардор бўлинг!