Баҳодир эгам

ҚИЗИЛТЕПА ТУМАНИМ 
Саксон ёшинг муборак, Қизилтепа туманим,
Талпинар сенга юрак, эй жонажон ватаним,
Сен эрурсан бебаҳо яшнаган ҳур чаманим,
Қутлуғ тўйинг муборак, Қизилтепа туманим!

Қизилтепа аслида қизил рангга қиёсдир,

Қизил юзли халқимга, Ватанимга ихлосдир,
Тепа – юксаклик, демак исминг жисмингга мосдир,
Қутлуғ тўйинг муборак, Қизилтепа туманим!

Улуғ алломаларинг номингни буюк этди,

Ҳақ сўзини айтганлар қатағон бўлиб кетди,
Шукурки халқимиз бугун ҳурлик йўлига етди,
Қутлуғ тўйинг муборак, Қизилтепа туманим!

Минг асрлар яшагин умринг кўп узун бўлсин,

Ўшанда ҳам ҳақ йўлда айтарли сўзинг бўлсин,
Баркамол ўғлонларинг, иболи қизинг бўлсин,
Тўкин дастурхонингда нон ила тузинг бўлсин,
Қутлуғ тўйинг муборак, Қизилтепа туманим!


БАХТИНГ КУЛСИН 

Ёруғ бўлсин осмонинг,

Бузилмасин маконинг,
Ошаверсин имконинг,
Бахтинг кулсин Ватаним,
Омон бўлгин Ватаним!

Омборларда тўлсин дон,

Тандирларда иссиқ нон,
Дуо қилинг онажон,
Бахтинг кулсин Ватаним,
Омон бўлгин Ватаним!

Жаннатмакон Туркистон,

Аҳил, иноқ беш ўғлон,
Мусаффо бўлар осмон,
Бахтинг кулсин Ватаним,
Омон бўлгин Ватаним!

Нақшбанд балогардон,

Темурий, Хожа Бўстон,
Руҳлари қўллар ҳамон,
Бахтинг кулсин Ватаним,
Омон бўлгин Ватаним!

Қ уръонни олдим қўлга,

Оллоҳни олдим тилга,
Рўшнолик берсин элга,
Бахтинг кулсин Ватаним,
Омон бўлгин Ватаним!
Тинчликда бўлгил омон,
Дўстларга таянч, дармон,
Мустақил Ўзбекистон –
Бахтинг кулсин Ватаним,
Омон бўлгин Ватаним!


САЖДАГОҲИМ 

Оллоҳ ягонадир, Оллоҳ буюкдир,

Ватан ягонадир, Ватан суюкдир,
Ватандин айрилмоқ энг оғир юкдир,
Барча офатлардан асра, Оллоҳим,
Ватан – саждагоҳим, Ватан –паноҳим!
Кўз очиб кўрганим, қувнаб юрганим,
Рисқу насибамни сендан терганим,
Бахту иқболимни сенда кўрганим,
Барчасини ўзинг асра, Оллоҳим,
Ватан – саждагоҳим, Ватан –паноҳим!

Боғ-бўстонларинг, чорбоғинг аро,

Ҳатто қир адиру ё чўли саҳро,
Уларнинг барчаси мен учун аъло,
Барча офатлардан асра, Оллоҳим,
Ватан – саждагоҳим, Ватан –паноҳим!

Сенинг шуҳратингдан келмай ўзимга,

Азиз тупроғингни суртгум кўзимга,
Сенга шукроналар айтдим сўзимда,
Барча офатлардан асра, Оллоҳим,
Ватан – саждагоҳим, Ватан –паноҳим!
Бағрингда соғ-омон юрганлар айтсин,
Истиқлол гаштини сурганлар айтсин,
Сенда ўз бахтини кўрганлар айтсин,
Барча офатлардан асра, Оллоҳим,
Ватан – саждагоҳим, Ватан –паноҳим!