Abbatisa – ayollar katolik monastirlarining boshqaruvchilari. Abbatlik

Berkibeynerlar – chipta kovush kiyib yuruvchilar. Norvegiyada aholining quyi, kambagʻallar toifasi shu nom bilan atalgan.
Berna (asosiy yoki umumiy) – oʻrta asrlarda Chexiyada davlatning asosiy soligʻi boʻlib, barcha feodal yerlaridan undirilishi oqibatida asosiy ogʻirlik dehqonlar va shaharliklar yelkasiga tushgan.
Berserk – qadimgi skandinaviyalik jangchi boʻlib, oʻzini oliy xudo Odin bilan bogʻlagan. U odatda janglarga sovutsiz kirgan va shu tufayli oʻz davrida juda mashhur boʻlgan.
Beylif – Angliyada yuzlik boshligʻi va sherifning yordamchisi boʻlgan mansabdor shaxs.
Bezant – Vizantiyaning oltin tangasi. Yevropaga XIII asr oʻrtalarida tarqalgan. XIII–XIV asrlarda kumushdan zarb qilingan bezantlar ham tarqalgan.
Bibliya (qad. yunon. Biblia – kitob) – Tavrot; yahudiy va xristianlarning muqaddas kitobi. B. 2 qismga – Tavrot va Injilga boʻlinadi. Tavrot yahudiy (qisman oromiy) tilida yozilgan boʻlib, yahudiy va xristianlar uchun muqaddas hisoblansa, Injil yunon tilida bitilgan va faqatgina xristianlar tomonidan e’tirof etiladi. Yahudiylarning muqaddas kitobi “Vetxiy zavet” asosida yozilgan deb koʻrsatiladi. “Vetxiy zavet” ma’lumotlarga koʻra, miloddan avvalgi XIII-II asrlarda kitob holiga keltirilgan deyiladi. Kitobning qadimgi oromiy va yahudiy tillaridan yunon tiliga tarjimasi Misrda Ptolomey (mil.avv.282-246) hukmronligi davrida amalga oshirilgan. Uni tarjima qilishda 70 ta tarjimon ishtirok etgan ekan. “Noviy zavet” kitobining toʻplanishi yunon tilida I–II asr boshlarida amalga oshirilgan. Lotin tiliga II-III asrlar tarjima qilingan. Gʻarbiy Yevropada B.ni boshqa tillarga tarjima qilish antik davrlardan boshlangan. Mas. yepiskop Ulfila got tiliga oʻgirgan. Papa Grigoriy VII (1080) davrida B.ni boshqa tillarga tarjima qilish taqiqlangan. Keyinchalik, Jon Viklef tomonidan ingliz, Yan Gus tomonidan chex va undan tashqari Martin Lyuter, Svingli, Parker va boshqalar tomonidan B.ning koʻplab tarjimalari amalga oshirilgan.