A. M. Karimova, D. M. Malikova pul va banklar

GLOSSARIY
Abstrakt mehnat - aniq shaklidan qat’iy nazar umuman inson ishchi kuchining sarflanishi, ijtimoiy mehnatning bir qismi.
Absolyut yer rentasi - yer egalari toʻla oʻzlashtiradigan ustama foyda.
Aval - veksel kafilligi boʻlib, bu ishni amalga oshirgan shaxs (avalchi) veksel boʻyicha majburiyat olgan shaxslardan birining ma’suliyatini oʻz zimmasiga oladi.
Aval krediti - bunda bank mijozining majburiyati uchun javobgarlikni oʻz zimmasiga oladi. Aval kreditini olgan mijoz toʻlovni amalga oshira olmay qolsa bank kafolatdor shaxs sifatida toʻlovni amalga oshiradi. Aval krediti uzoq va qisqa muddatli boʻlishi mumkin.
Avans - korxonaning bajariladigan ish, yetkazib beriladigan mol-mulk, koʻrsatiladigan xizmatlar va boshqalar uchun toʻlanadigan toʻlovlar hisobiga beradigan dastlabki pul summasi.
Aktiv - 1. Buxgalterlik balansininig xoʻjalik mablag’larining holati aks ettiriladigan chap tomoni. 2.Jismoniy yoki huquqiy shaxsga tegishli mol-mulk yig’indisi: asosiy vositalar, ishlab chiqarish moddiy zahiralari, nomoddiy aktivlar, pul mablag’lari, moliyaviy qoʻyilmalar.
Aktiv operasiyalari - bu banklarning foyda olish va bank likvidligi (toʻlovga qobiliyati)ni ta’minlash maqsadida oʻz mablag’larini xoʻjaliklar va aholi ehtiyoji uchun joylashtirilishidir.
Aksioner - aksionerlik jamiyatining muayyan aksiya ulushiga egalik qiluvchi va jamiyat me’yorida faoliyat koʻrsatayotganda shu ulushga mutanosib dividend olib turuvchi a’zosi.
Aksioner bank - aksioner jamiyat (aksiyadorlik jamiyatiga qarang) kabi ochiq turdagi yoki yopiq turdagi banklar. Aksionerlar safiga kirish aksiyalarni sotib olish yoʻli bilan amalga oshiriladi..
Badal - 1. Biror narsa evaziga toʻlanadigan haq. 2. Keyinchalik: biror tashkilot, jamiyat, uyushmalarga hamda shu kabilarga a’zo boʻlgan shaxsning oʻz jamiyatini iqtisodiy jihatdan qoʻllab-quvvatlash maqsadida unga toʻlab turadigan puli, a’zolik haqqi.