Zoologiya(Omirtqali) pa'ninen Laboratoriyalıq jumıslar Jumıstı orınlawǵa kórsetpeler

Qan aynalıs sisteması. Dóńgelek awızlılardıń qan aylanıs sisteması lancetnikke júdá uqsas bolsada, onnan júreginiń bolıwı menen ayırmashılıq etedi.
Pereparatta minoga júreginiń eki bólimi: juqa diywallı júrek aldı, júrek qabınıń shep bóliminde hám tıǵız prizma formasındaǵı qarınsha anıq kórinip turadı.
Júrek aldına qalta tárizli venoz sinusı (venoz pazuxası) tikkeley tiyip jatır (11 s).

11-súwret. Minoganıń qan aylanıs sisteması.
1-aorta túbiri, 2-shıǵarıwshı saǵaq arteriyası, 3-aldıńǵı kardinal vena, 4-arqa aortası, 5-artqı kardinal vena, 6-ishek arteriyası, 7-ákeliwshi saǵaq arteriyası, 8-qursaq aortası, 9-saǵaq tesigi, 10-qarınsha, 11-júrek aldı, 12-venozlıq sinus, 13-bawır venası, 14-ishek astı venası, 15-quyrıq venası hám arteriyası, 16-uyqı arteriyası. Venalar qara reńde, arteriya sızıqshalanǵan.

Júrektiń barlıq bóliminde vena qanı boladı. Qarınshanıń aldınǵı bóliminen alǵa qaray juwan túbirli qursaq aortası, onnan ákeliwshi jup saǵaq arteriyası shıǵıp saǵaq aralıq diywallarǵa ketedi hám saǵaq japıraqshalarında kapillyar torların payda etedi. Kapillyarlar áketiwshi saǵaq arteriyalarına jıynalıp xorda astında jaylasqan taq arqa aortasına ótedi. Onnan bas bólimine qaray eki jup uyqı arteriyası ketedi. Gewdede arqa aortası mayda qan tamırları arqalı qandı ishki organlarǵa jetkerip berip, deneniń aqırında tikkeley quyrıq arteriyasına ótedi.

Barlıq deneden qan venalar boyınsha venozlıq sinusqa jıynaladı. Gewdeniń artqı bóliminen vena qanı quyrıq venası boyınsha kelip, onnan arman jup artqı kardinal venasın payda etedi. Olar júrek tusında jup aldınǵı kardinal venası menen qosılıp venoz sinusınıń joqarǵı bólimine quyadı.
Isheklikten shıǵıwshı mayda qan tamırları ishek astı venasın dúzip ol bawırda kapillyar darwaza sistemasın payda etedi. Bawırdan qan venoz sinusınıń tómengi bólimine túsedi. Dóńgelek awızlılarda kyuver tútigi bolmaydı.
Bólip shıǵarıw organları. Minoganıń bólip shıǵarıw organı xızmetin birinshi (gewde) buyregi atqaradı. Olar taspa tárizli formada bolıp arqa aortanıń eki qaptalında barlıq qursaq quwıslıǵın boylap jatadı. Onı jınıs bezin sál ısırıp anıq kóriwge boladı. Buyreklerde basqa quwıslıq organları sıyaqlı sharbıda asılıp, artqı ushı ádewir iri hám sol jerde sidik jolı-volf kanalıda jaqsı kórinedi. Sidik jolı, sidik-jınıs sorıǵıshınıń ushında sırtqa ashılıwshı sidik-jınıs sinusına quyadı.