Ўзбекистон республикаси адлия вазирлиги тошкент давлат юридик институти шорахметов шоакбар шорустамович

238⁷-м о д д а. Суд буйруғини чиқариш муддати


Арз қилинган талабнинг мазмуни бўйича суд буйруғи ариза судга келиб тушган кундан эътиборан уч кун ичида судья томонидан чиқарилади.

Фуқаролик процессуал қонунчиликда суд буйруғини чиқариш учун процессал муддат белгиланган бўлиб, унга кўра суд буйруғи ариза келиб тушган кундан эътиборан уч кун ичида судья томони­дан чиқарилади. Суд томонидан суд буйруғини чиқариш учун қисқа муддатнинг белгиланиши, аввало, ундирувчининг қонуний ҳуқуқ ва манфаатларини ўз вақтида ва тўғри ҳал этиш каби фуқаролик суд ишларини юритиш вазифаларидан келиб чиқади. Ушбу ўринда мазкур муддатнинг айрим МДҲга аъзо давлатлар фуқаролик процессуал қонунчилигида белгиланган муддатлардан бирмунча қисқа эканлигини эътироф этиш лозим. Хусусан, Россия Федерацияси ФПКнинг 126-моддасига кўра, арз қилинган талаб­нинг мазмуни бўйича суд буйруғи ариза судга келиб тушган кундан эътиборан беш кун ичида судья томонидан чиқарилиши белги­ланган.¹

Суд буйруғини бериш тўғрисидаги масалани судья ундирувчи ва қарздорни чақирмасдан ҳал этади. Суд буйруғи ишни мазмунан кўрмасдан, судьянинг якка ўзи томонидан чиқариладиган ҳужжат ҳисобланади. Ушбу ўринда судья гувоҳ кўрсатмаларини ва эксперт хулосаларини текширмайди, ундирувчи ва қарздорнинг тушунти­ришларини эшитмайди, у мавжуд ҳужжатлар асосида ўз буйруғини чиқаради.


238⁸-м о д д а. Суд буйруғининг мазмуни


Суд буйруғида қуйидагилар кўрсатилади:
1) иш юритиш тартиб рақами ва буйруқ чиқарилган сана;
2) суднинг номи, буйруқ чиқарган судьянинг фамилияси ҳамда исми ва отаси исмининг бош ҳарфлари;
3) ундирувчининг номи (фамилияси, исми ва отасининг исми), яшаш жойи ёки жойлашган ери;
4) қарздорнинг номи (фамилияси, исми ва отасининг исми), яшаш жойи ёки жойлашган ери;
5) талабни қондириш учун асос бўлган қонун;
6) ундирилиши лозим бўлган пул суммасининг миқдори ёки талаб қилиб олиниши лозим бўлган кўчар мол-мулкнинг қиймати ҳам кўрсатилган ҳолдаги белгиси;