ЎҚув адабиёти овқатланиш

Асосий озуқа манбалари ва организмни таъминлаш имкониятлари. Тўлақонли турли-туман парҳезлар таркибида убихинон 3 ... 10 мг/сут миқдорида тушади, бу асосан, ҳайвон маҳсулотлари, ўсимлик ёғлари, ёнғоқлар ҳисобидан бўлади. Мевалар, сабзавотлар, тухум ва сут маҳсулотлари таркибида убихинонлар аҳамиятсиз даражада бўлади.
Тахминан 14 ... 23 % Q10 коэнзим овқат тайёрланаётганда парчаланади – тухум ва сабзавотлар таркибидаги убихинонлар билан бундай бўлмайди.
Тавсия этилувчи истеъмол миқдори. Q10 коэнзим истеъмолининг ўхшаш даражаси аниқ белгиланмаган. Убихинонларнинг организмнинг суткалик эҳтиёжини қондирувчи тахминий миқдори (озуқавий ва биосинтезланган шаклларини ҳисобга олган ҳолда) 30 мг/сут атрофида бўлади.
Танқислиги ва ошиқчалигининг белгилари ва асоратлари. Q10 коэнзим танқислигининг белгилари таърифланмаган. Убихинонларнинг функционал танқислиги улар биосинтезининг ферментатив занжири ирсий нуқсонларида ривожланиши мумкин эмас, шунингдек, даволаш мақсадларида биосинтезнинг энг асосий ферментларидан бирини ингибирловчи статинлар қўлланилганида юзага чиқиши мумкин.
Q10 коэнзим заҳарли эмас, аммо катта миқдорда антикоагулянтларнинг самарасини пасайтириши мумкин.
Инозит. Инозит (таркибида фосфор мавжуд бўлган циклик олти атомли спирт) – сувда эрийдиган бирикмадир. У организмга овқат билан икки ҳил асосий шаклда: ўсимлик манбаларидаги фитин кислотаси ва ҳайвон маҳсулотлари таркибидаги фосфатидли кўринишда тушади. Овқатдаги инозит миқдори 100 г маҳсулотда 10 дан 900 мг. гача оралиқда бўлади. Инозитга бўлган эҳтиёж тахминан 500 ... 1000 мг/сут бўлади.
Инозит аъзо ва тўқималарда тезгина қайта тақсимланади, мияда фосфолипидлар ва дифосфоинозидцефалин кўринишида тўпланади ва буйракларда концентрацияланади. Пешоб билан ҳар куни 35 ... 85 мг инозит ажралади. Қандли диабетда инозитнинг пешоб билан йўқотилиши ошади.
Инозит фитин кислотаси шаклида ва унинг эримайдиган кальцийли- магнийли тузи – фитин кўринишида овқат толалари хусусиятига эга бўлади: ичаклар моторикасини кучайтиради, кальций, магний, фосфор, темир ионларини сорбциялайди (уларнинг биологик ҳаммабоплигини кескин пасайтиради), гипохолестеринемик таъсирини таъминлайди, ичак микрофлораси томонидан фойдаланилади.