Раќим соли бођдонли

УШЛАТДИНГ ҚЎЛИНГНИ

Ушлатдинг қўлингни, қўймадинг қўлим,

Ажиб бир саодат, яйради кўнглим,
Бир тушди сен билан бул ҳаёт йўлим,
Бир зум қучоғимда очилдинг гулим,
Тан олдинг мени деб: «Сайроқ булбулим!»

Лаҳза дам – биз учун бир умр сабоқ,

Лаҳза дам – тор гўша бўлди оромгоҳ,
Лаҳза дам – қўшганди, чекинди фироқ,
Бир зум қучоғимда очилдинг гулим,
Тан олдинг мени деб: «Сайроқ булбулим!»

Лаҳза дам – куй-қўшиқ бўлиб туюлди,

Қаламдан ҳар бир сўз шодон қуюлди,
Оллоҳга бизлардек ким ҳам суюлди,
Бир зум қучоғимда очилдинг гулим,
Тан олдинг мени деб: «Сайроқ булбулим!»

Нурли чўққидаман, ёнда юлдузим,

Нурдан қамашарди боққанда кўзим,
Олов қўйнидадек ҳис этдим ўзим,
Бир зум қучоғимда очилдинг гулим,
Тан олдинг мени деб: «Сайроқ булбулим!»

Лаб лабнинг шарбатин симирди тоза,

Бунчалар тотлийди севишгач, бўса –
Чанқоқ диллар сармаст ичгандек бўза,
Бир зум қучоғимда очилдинг гулим,
Тан олдинг мени деб: «Сайроқ булбулим!»

Муҳаббат мавжида кез, майли Раҳим,

Бахтинг оғушингда, сез, майли Раҳим,
Толеинг кўз-кўз эт, тез, майли Раҳим,
Бир зум қучоғимда очилдинг гулим,
Тан олдинг мени деб: «Сайроқ булбулим!»


КЕЛ, САНАМЖОН

Яқин олиб, мен атай сенга,

Кўнглим очиб сўз қотай сенга.
Кел, санамжон, шеър атай сенга,
Кел, санамжон, шеър айтай сенга.

Бедор қалбим англатай, елгин,

Меҳрингни лов ёндириб келгин,
Қуёшни лол қолдириб келгин,
Кел, санамжон, шеър айтай сенга.

Навбаҳорим, нолиш ярашмас,

Нолакорга ҳеч ким қарашмас,
Фироқ дардин этайликда бас –
Кел, санамжон, шеър айтай сенга.

Кел, санамжон, шеър атай сенга,

Кел, санамжон, шеър айтай сенга.


ҚОРАКЎЗ

Кундуз қуёш бўлсам-у боқсам,

Тун кечада порласам – юлдуз.
Ойдин чоқда ой каби балқсам,
Топарманми, сени, қоракўз.

Қуёшим деб, кўрсата қол юз,

Юлдузим деб, чиққин юзма-юз.
Ойюзлигим, тўсиқларни буз –
Топарманми, сени, қоракўз.

Бахтли ҳамроҳ билдим ўзингни,

Қалблар англар бир-бирин бесўз.
Қилмай огоҳ келдим, ўзингни –
Топарманми, айтгин, қоракўз.

Қалблар англар бир-бирин бесўз,

Қалблар айлар севинчин кўз-кўз.
Ошна, ташна кўришарлар юз,
Раҳим излар – кутгин, қоракўз.