Раќим соли бођдонли

2007.01.1


ҚАЙДАСАН, ЖОНИМ

Ўзгинанг, ўзингсан – гули хандоним,

Ўзгинанг ёнимда гуллар имконим.
Ўзгинанг, ўзингсан – тенгсиз жаҳоним,
Сўроқлар дилгинам, қайдасан, жоним.

Танга чўғ ташлаган ханданг соғиндим,

Кўнглимни хушлаган ханданг соғиндим,
Тонгга йўл бошлаган ханданг соғиндим,
Сўроқлар дилгинам, қайдасан, жоним.

Ибо-ла боқишинг бир олам соғинч,

Куйласам, балқишинг бир олам соғинч,
Куйдириб ёқишинг бир олам соғинч,
Сўроқлар дилгинам, қайдасан, жоним.

Дилинг ишқ ўртаса қайтасан, жоним,

Нелар кечди бошдан айтасан, жоним,
Ишончим – ёнимга қайтасан, жоним,
Сўроқлар дилгинам, қайдасан, жоним.
2008-02-16


СОҒИНЧ

Бир кун айри тушсам куйдирар соғинч,

Суйганим, яна-да суйдирар соғинч,
Ҳижрон азобига тўйдирар соғинч,
Етиб келмай қолсанг ўлдирар соғинч.

Тасоддиф деб билма танда жоним сен,

Танга жон бахш этган қайноқ қоним сен,
Қаламни қайраган, жўшган оним сен,
Келмай, ғамга солсанг ўлдирар соғинч.

Ҳаётимнинг тоти сен билан санам,

Ҳажр ўтин доди сен билан санам,
Муҳаббатнинг ёди сен билан санам,
Ташлама, сўрар жон, ўлдирар соғинч.

Ёр учун ўлимдан қўрқар демагин,

Қўрқоқ-ла бўлмоқни бир ор демагин,
Жон фидо этмаскан ул ёр демагин,
Жоним – ўзинг ишон, ўлдирар соғинч.
2008-05-17


ХОТИН-ҚИЗЛАРГА БАЙРАМ ТАБРИГИ

Сизни табриклашдан бошим осмонда,

Кўнгилдан ёғилар тилаклар чексиз.
Сиздан улкан ким бор кўркам чаманда,
Қадри буюк – бугун, эрта ҳам сизсиз.

Боғимда гул унса, чароғбони сиз,

Ошиқ дил маскани, тенгсиз хотирот.
Сиз Фарҳод Ширини, Меҳинбону сиз,
Англаб англанмаган минг бир тилсимот.

Тарихни яратган, тебратган – она!..

Усиз келажакни топдик қайдан ҳам.
Инсон инсонлиги сизда нишона,
Бутун эзгулик – сиз, сизда мужассам.
1990-02.28