O’zbekiston respublikasi oliy va o’rta maxsus ta’lim vazirligi samarqand veterinariya meditsinasi instituti

Transport vositalar, apparatlar, idishlar, xona va maxsus kiyimlarni pestitsid qoldiqlaridan zararsizlantirish paytidagi xavfsizlik qoidalari. “Pestitsidlar bilan zararlangan qishloq xo‘jalik mashinalari, ombor, anjom uskunalar va transport vositalarini pestitsid qoldiqlaridan tozalash” maxsus qo‘llanmasi zararsizlantirish ishlarida asosiy manbadir.Transport vositalari, xona, idishlar va maxsus kiyimlarni pestitsid qoldiqlaridan zararsizlantirish uchun, maxsus jixozlanib ajratilgan ochiq havo maydonida yoki havoni so‘ruvchi moslamalar bilan jixozlangan xonalarda mas’ul shaxslar tomonidan o‘tkaziladi. Bu ishlarni suv havzalari, kanallar, daryo qirg‘oqlari yaqinida bajarish qat’iy man etiladi. Pestitsidlarni tashib yuruvchi transportlar, purkagich, changlagich va boshqa apparatlar bir oyda kamida ikki marta xlorli ohakning quyuq aralashmasi 1kg xlorli ohak bilan 4 litr suv aralashmasi bilan zararsizlantiriladi va bir soatdan so‘ng suv bilan yuvib tashlanadi.Xlor va fosfororganik, dinitrofenol va boshqa pestitsidlar bilan zararlangan idishlar 5% li kaustik soda eritmasi bilan to‘ldirilib, 6-12 soat davomida saqlanadi, shundan so‘ng bir necha marta suv bilan yaxshilab yuviladi. Soda o‘rniga kul ishlatsa ham bo‘ladi, buning uchun kulga suv qo‘shib quyuqlashgan aralashma tayyorlanadi va uni idishlarga solib, yaxshilab chayqatiladi. Idishlarni yuvgandan qolgan suv va boshqa aralashmalar maxsus chuqurlarga to‘kiladi.

Karbamin guruhiga kiruvchi pestitsidlar bilan zararlangan idishlar 1% li permanganat eritmasi, 5ml. Xlorid kislotasining 1 litr suvdagi eritmasi yoki xlorli ohak quyqasi bilan yuviladi.Pestitsidlar bilan zararlangan xona va uning poli 200-300gr kalsiylangan sodaning 10l suvdagi eritmasi bilan yuvib chiqiladi. So‘ngra xlorli ohakning 10% li eritmasida qaytadan yuviladi. Pestitsidlar bilan zaharlangan erlar xlorli ohak bilan ishlangandan keyin shudgorlanadi.