O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

16.6. Protsessning boshqa ishtirokchilariga taalluqli umumiy shartlar

Jinoyat ishini tergov qilish davomida tergov harakatlarini boshqa tumanda oʻtkazish zarurati yuzaga keladi. Ushbu holda tergovchi mazkur harakatlarni shaxsan oʻzi oʻtkazishi yoki bu ishni boshqa tuman tergovchisiga yoxud topshiriqni tergovchi aytgan muddatda bajarishi shart boʻlgan surishtiruv organiga topshirishga haqlidir.

Tergovchining bunday talabi alohida topshiriq deb ataladi. Alohida topshiriq ishni yuritayotgan tergovchining JPKning 347-moddasiga muvofiq tergov harakatlari oʻtkazish topshirilayotgan tergovchiga xat shaklida ifodalanadi. Unda tergov qilinayotgan jinoyat ishining asosiy holatlari, bajarilishi kerak boʻlgan harakatlar roʻyxati bayon qilinadi.

Mavzu boʻyicha xulosalar

Mazkur mavzuni oʻrganishda oʻquvchilar dastlabki tergovning umumiy shartlarini xalqaro hujjatlarda va tarmoq qonun hujjatlarida mustahkamlanishiga oid masalalarni koʻrib chiqishlari; qiyosiy-huquqiy tahlil oʻtkazib, jinoyat ishlari boʻyicha dastlabki tergovni olib borishdi ularning rolini anglab olishlari lozim.

Muammoli savollar va kazuslar

1. Dastlabki tergovning umumiy shartlari tushunchasini ayting?
2. Tergovga tegishlilik nima va uni aniqlash qanday belgilarga asoslanadi?
3. Jinoyat ishi boʻyicha dastlabki tergovni tergovchilar guruhiga topshirishning xususiyatlari?
Kazus.
Voyaga yetmagan Beknazarov va Karaxanov nafaqador Dadamirzayevga tan jarohati yetkazishadi va bu holat jabrlanuvchining salomatligiga qisqa muddatga buzilishiga olib keladi. Prokuratura tergovchisi jinoyat ishini qoʻzgʻatdi.
Prokuratura tergovchisining qarori qonuniymi? Mazkur ishning tergovga tegishliligini aniqlang.
XVII BOB. JINOYAT ISHIDA GUMON QILINUVCHI VA AYBLANUVCHI TARIQASIDA ISHTIROK ETISHGA JALB QILISH
(Muallif – D.Kenjaboyev)


Annotatsiya: oʻquvchilar uchun mazkur mavzuni oʻrganish jinoyat ishida gumon qilinuvchi tariqasida va ayblanuvchi tariqasida ishtirok etishga jalb qilishning tushunchasi, asoslari, shartlari, protsessual tartibi, ayblov oʻzgartish, tugatish va qayta tiklash qoidalarini tahlil qilishga imkon beradi.