Nizomiy nomidagi toshkent davlat pedagogika universiteti arxeologiyadan izohli lug

Budda dini inshootlari – asosan, 3 xil inshoot bunyod etilgan: vixara (monastir), chaytya (ziyoratgoh, ibodatxona), stupa. Ular yirik shaharlar ichida, atroflarida va magistral yo‘l bo‘ylarida qurilgan.
Budda dini monastirlari – Kushonlar imperiyasi davrida Baqtriyada quyidagi turlarda monastirlar qurilgan: yer ustida, yer ostida, tabiiy va sun’iy g‘orlarda, ikki qavatli, ya’ni yer osti va ustida bunyod etilgan.
Burg‘ulik madaniyati – Toshkent vohasida so‘nggi bronza va ilk temir davrida shakllangan arxeologik madaniyat bo‘lib, xronologik jihatdan mil. avv. IX–IV asrlarni o‘z ichiga oladi. Bu madaniyatga tegishli yodgorlik dastlab Ohangaron daryosining Toshkent dengizi tomon ketgan Burganlisoy o‘zani sohilidan topib o‘rganilgan. Yodgorlik nomi shundan olingan. Unga tegishli manzilgohlar Ohangaron daryosining irmoqlari – hozirgi Jo‘n va Salor kanallari havzalaridan topilgan. Burg‘ulik madaniyati Toshkent vohasining ko‘chmanchi chorvachilikdan o‘troq dehqonchilikka o‘tgan aholisining madaniyati hisoblanadi. U kelib chiqish jihatidan qadimgi Farg‘onaning Chust madaniyati, Zarafshon vodiysining Ko‘ktepa–1, Janubiy O‘zbekistonning Kuchuk–1, Qizil–1, Janubiy Turkmanistonning Yoz–1 va Shimoliy Afg‘onistonning Tilla–1 madaniyatlariga o‘xshashligi isbotlangan.