Microsoft Word togaymurod otamdan qolgan dalalar lotin ziyouz com doc

YeTTINCHI BOB 
 
1
Oq tuproq dalam ko‘saklari uch-uchidan yorildi. Oqtuproq dalam ko‘saklari uch-uchidan ochildi. 
Oqtuproq dalamga oq oraladi. 
Bemavrid oq oraladi! 
Oqtuproq nozik-nozik yer bo‘ladi. Oqtuproq oriq-oriq yer bo‘ladi. 
Shu bois, oqtuproq yer bulayga sillasi qurib qoladi. Oqtuproq yer bulayga darmonsiz bo‘lib qoladi. 
Oqibat — oqtuproq g‘o‘za eldan burun pishadi. 
Oqtuproq g‘o‘za elburutdan ochiladi. 
Oppoq-oppoq raqqosa qizlar bo‘ladi. Yalt-yult raqqosa qizlar bo‘ladi. 
Raqqosa qizlar ko‘zni oladi. Raqqosa qizlar es-hushni oladi. 
Ammo... raqqosa qizlar paxta terolmaydi. Raqqosa qizlar xamir qorolmaydi. Raqqosa qizlar qozon 
qaynatolmaydi. Oqtuproq ana shu raqqosa qizlarday bo‘ladi! 
Oqtuproq sin-sinbat bo‘ladi, oqtuproqda qut-barakot bo‘lmaydi! 
 
2 
G‘o‘zalarim boshidan kun urdi, ostidan nam urdi. 
Oqibat — g‘o‘zalarim ora-oralari dim-dim bo‘ldi. G‘o‘zalarim ora-oralari buk-buk bo‘ldi. 
Bunday vaqtda traktor bilan g‘o‘za oralab bo‘lmaydi. 
Traktor ochilmish paxtalarimni chuvalatib-chuvalatib tashlaydi. Traktor ochilajak paxtalarimni 
to‘zg‘itib-to‘zg‘itib tashlaydi. Traktor ko‘saklarimni ezib-ezib tashlaydi. 
G‘o‘zalarim orasini shamollatmasam — tag‘in bo‘lmaydi. 
Ko‘saklarim dimda pongsib-pongsib qoladi. Ko‘saklarim bukda chirib-chirib qoladi. Omon 
qolmish ko‘saklarim ochilmay-ochilmay qoladi. 
Men ana shunda birdan-bir yo‘ldan bordim — bor dehqonlarim bilan sochilib-sochilib g‘o‘za 
oraladim. 
G‘o‘zalarimni qimirlatib-qimirlatib oraladim. G‘o‘zalarimni turtib-turtib oraladim. 
G‘o‘zalarim shamolladi — ko‘saklarim havo oldi. 
3
— Sizni Toshkanga uch kunlik ko‘rikka jo‘nataman, Dehqonqul aka, —dedi raisimiz. — Bir 
ko‘ngilni cherini yoyib kelasiz. 
— Qanday ko‘rik? — dedim. 
— Paxta tergich mashinalar ko‘rigi bo‘lar emish. 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
94
— Dalada ish qo‘qib yotgan bir vaqtda-ya? 
— Endi, siyosat-da, Dehqonqul aka, siyosat. 
— Unda, o‘zingiz borib kela qoling, rais bova? 
— Qani edi, bir sayrlab kelar edim. Kattalar mexanizator-brigadir boradi, deyapti-da. 
— Bir odamni ikki bo‘ladigan kunda-ya? 
— Bari kolxozdan birovdan ilg‘or borayapti. 
— Men borolmayman, rais bova, borolmayman. 
— Do‘ppingizni osmonga otsangiz-chi, Dehqonqul aka! Toshkanni aylanib kelasiz! Yo‘l 
xarajatlaringizni kolxoz to‘laydi! 
Ana shunda jonim kirdi! 
— Maylingiz, rais bova, — dedim. — Ko‘p qo‘ymadingiz, maylingiz. 
— Xo‘-o‘sh, qayta-qayta cho‘miling... Yaxshilab kiyining. Toshkan o‘z oti o‘zi bilan Toshkan. 
Ust-bosh bordir? 
— Bor, yo‘q emas, bor. Lekin barini ohori to‘kilib yotibdi. Shu tevarakda kiysa bo‘ladi. 
— Unda, bo‘lmaydi. Siz respublika anjumaniga borayapsiz. Shu, partkomda fason-fason kiyimlar 
ko‘p. Bir sidrasini olib beraman. Uch kunga yeyilib ketmaydi. 
Men ertalab partkom uyilab bordim. Dardimni aytdim. 
— Xabarim bor, rais aytib edi, — dedi partkom. — Faqat, gard yuqtirmay qaytarib kelasiz!