Korxonalar faoliyatini boshqarishning nazariy asoslari

Faxmga tayanib qaror qabul qilishda rahbar xodimlar asosan ichki hissiyot va tuyg`ularga asoslanadilar. Bunday yo`l tutish tanlangan qarorlarni doimo to`g`ri deb baholashga undaydi. Tajriba oshishi bilan rahbarning «ichki sezgilari» mukammallashib borsada, faqatgina faxmga tayanadigan boshqaruvchilarning to`g`ri qaror qabul qilish imkoniyatlari unchalik yuqori emas.

Mulohazaga tayanib qarorlar qabul qilish asosida bilim va oldingi tajribalarga tayanish muhim o`rin tutadi. Chuqur nazariy bilim va ish tajribalaridan kelib chiqib, sog`lom idrok asosida eng yuqori samara keltiradigan qaror qabul qilinadi. Ammo, qaror qabul qilishning bu usuli ham kamchiliklardan xoli emas. Uning asosiy kamchiligi shundaki, oldin tajribada uchramagan vaziyatlar bo`yicha to`g`ri qarorlar qabul qilish imkoniyatlari chegaralangan bo`ladi.

Faxm va mulohazaga tayanuvchi boshqaruv qarorlari xodimlarni operativ boshqarish jarayonida qo`llanilsa, strategik va taktik boshqaruvda iqtisodiy tahlil, asoslash va optimallashtirish usullariga tayanuvchi ratsional boshqaruv qarorlaridan foydalaniladi.

Qarorlar insonlar tomonidan qabul qilinishini hisobga olsak, ularda shu qarorlarni qabul qilgan shaxslar xarakteriga xos xususiyatlarni ko`rish mumkin. Shu munosabat bilan qarorlarning puxta o`ylangan, tasodifiy, tavakkal qabul qilingan va sust turlari farq qiladi.