Иқтисодий таҲ

Талаба билимини назорат қилиш ҳамда мустаҳкамлашга оид савол ва топшириқлар

1. Иқтисодий таҳлилнинг дастлабки бошланғич даври ва Ўзбекистонда иқтисодий таҳлилнинг ҳолати.

2. Иқтисодий таҳлил ва диалектиканинг асосий тамойиллари.
3. Умумназарий жиҳатдан анализ, синтез, дедуксия, индуксия тушунчаларининг моҳияти.
4. Резервлар тўғрисида тушунча, уларнинг қандай турлари бор?
1-топшириқ.
Билиш назарияси ва иқтисодий таҳлил тўғ рисидаги хорижий ва республикамиз иқтисодчи олимларининг қарашларини мустақил равишда ўрганиб чиқинг ва фикрларингизни билдиринг.
2-топшириқ.
Иқтисодий таҳлилнинг макро ва микро даражага бўлиниши ва таҳлил обектларини ҳам ушбу даражаларга бўлиб ўрганишнинг сабабларини изоҳлаб беринг.
3-топшириқ.
Ўзбекистон Республикасида иқтисодий таҳлилни ривожлантириш истиқболларини кўрсатиб беринг.


2- БОБ. ИҚТИСОДИЙ ТАҲЛИЛНИНГ МАЗМУНИ, ПРЕДМЕТИ ВА ВАЗИФАЛАРИ


2.1. Иқтисодий таҳлил мазмуни

Иқтисодий таҳлил ўз мазмуни жиҳатидан турличадир. Таҳлилнинг икки хил йўналиши мавжуд: молиявий - иқтисодий ва техник - иқтисодий. Молиявий - иқтисодий таҳлилда бизнес-режанинг бажарилишига таъсир кўрсатувчи (техника, технология, ишлаб чиқаришни ташкил этиш) каби омиллар ўрганилмайди. Техник-иқтисодий таҳлилда эса техника ва технология ҳамда ишлаб чиқаришни ташкил этишга оид ҳамма масалалар ҳар томонлама ва чуқур ўрганилиб, унинг ишлаб чиқариш самарадорлигини оширишга кўрсатган таъсири ҳам аниқланади. Таҳлил корхона ва унинг бўлинмалари фаолиятининг ҳамма томонларини ўз ичига олган умумий ҳамда ишнинг қандайдир бирор томони ёки корхонанинг бир неча бўғинларини ўз ичига олган танланма (тематик) бўлади. Шунингдек, йирик масалаларга бағишланган, корхонанинг кундалик ишини ўрганишга ва ички имкониятларини топишга қаратилган тезкор таҳлил бўлади. Қабул қилинадиган қарорларнинг характерига қараб, таҳлил қуйидагиларга бўлинади: дастлабки, тезкор, якуний ва истиқболли.

Таҳлил ўтказиш муддатлари: ҳар куни, бир ойда ва бир йилда ёки зарур бўлишига қараб аҳён-аҳёнда олиб борилиши мумкин.
Иқтисодий таҳлил ўтказишнинг босқичларини 2.1-чизмада кўриш мумкин.