Е. Б. Бабский, А. А. Зубков, Г. И. Косицкий, Б. И. Ходоров

17 ОЛИЙ НЕРВ ФАОЛИЯТИ
Бош мия катта ярим шарлар пўстлоғи ва унга яқин тузилмалар (пўстлоқ остидаги тузилмалар) марказий нерв системасининг олий бўлими бўлиб, организмнинг хулқ-атвори бу бўлимнинг ишлашига боғлиқ. Организм хулқ-атвори олий нерв фаолияти ҳисобланади, шу фаолият натижасида организм билан ташқи муҳит нисбати ўзгаради.
Олий нерв фаолиятига қарама-қарши ўлароқ, қуйи нерв фаолияти организм ичидаги функцияларни бирлаштирадиган, интеграллайдиган реакцияларнинг йиғиндисидан иборат.
Олий нерв фаолияти катта ярим шарлар пўстлоғи ва унга яқин ту-зилмалар (пўстлоқ остидаги тузилмалар)нинг муқаррар иштироки билан юзага чиқадиган мураккаб рефлектор реакцияларда намоён бўлади.
Бош мия фаолиятининг рефлектор характери ҳақидаги тасаввурни биринчи марта ватанимиз физиологиясининг асосчиси И. М. Сеченов «Бош мия рефлекслари» («Рефлексы головного мозга») деган китобида кенг ва мукаммал ривожлантирган. Бу классик асарнинг ғоявий установкаси цензуранинг зўри билан ўзгартирилган дастлабки номи — «Психик процессларга физиологик асослар киритиш йўлидаги уриниш»да ўз ифодасини топган. И. М. Сеченовга қадар физиологлар ва неврологлар психик процессларни объектив равишда, нуқул физиология нуқтаи назаридан анализ қилиш мумкин деган масалани ўртага қўйишга журъат этмаган эдилар. Психик процесслар бутунлай субъектив психологияга қарам бўлиб қолган эди.
И. М. Сеченов идеялари И. П. Павловнинг ажойиб асарларида порлоқ равишда тараққий топди. И. П. Павлов катта ярим шарлар пўстлоғининг функцияларини объектив экспериментал метод билан текшириш
йўлларини топди ва олий нерв фаолияти ҳақида мунтазам таълимот
яратди.
Марказий нерв системасининг қуйи бўлимларида — пўстлоқ остидаги ядролар, мия стволи, орқа мияда — рефлектор реакциялар ирсият йўли билан мустаҳкамланган туғма нерв йўллари орқали юзага чиқса, катта ярим шарлар пўстлоғида нерв алоқалари ҳайвонлар билан одамнинг индивидуал ҳаёт процессида, организмга сон-саноқсиз шароитлар таъсир этиши натижасида вужудга келишини И. П. Павлов кўрсатиб берди.
Бу фактнинг кашф этилиши организмда рўй берувчи ҳамма рефлектор реакцияларни шартсиз ва шартли рефлекслар деган иккита асосий группага ажратишга имкон берди.