Dawletmuratov Adilbay Mirzabaevich

TEMA. EKONOMIKALÍQ TEORIYA PÁNINIŃ PREDMETI HÁM BILIW USÍLLARÍ

1-lekciyanıń jobası:

1. 
   Ekonomikalıq teoriyanı úyreniwdiń zárúrligi hám áhmiyeti
   
2. 
   Ekonomika túsinigi hám onıń baslı máselesi. Mútájliklerdiń mazmunı hám olardıń klassifikaciyalanıwı.
   
3. 
   Ekonomikaġa tiyisli bilimlerdiń qáliplesiwi hám rawajlanıwı
   

1. Ekonomikalıq teoriyanı úyreniwdiń zárúrligi hám áhmiyeti

Hár tárepleme jetilisken joqarı mádeniyatlı shaxstı tárbiyalawda, onıń ilimiy dúnya kóz-qarasın qáliplestiriwde ekonomikalıq teoriya páni ayrıqsha orın iyeleydi. Ekonomikalıq teoriya pánin úyreniw insannıń ilimiy dúnya kóz-qarasın ózgertedi, onıń intellektual rawajlanıwın qollap-quwatlaydı, eń qızıqlı sabaǵına aylanadı. Sonday-aq, bul pán jámiyettiń hár bir aǵzasın ideyalıq jaqtan baǵdarlaw, ruwxıy dúnya kóz-qarasın keńeytiw, ekonomikalıq mádeniyatın joqarılatıwǵa ayrıqsha tásir kórsetedi.

Ekonomikalıq teoriya oqıtıwshısı turaqlı óziniń pedagogikalıq sheberligin arttırıp, onı sheberlik dárejesine jetkerip barıwı, sonday-aq óz pikirin túsinikli, kórgizbeli sáwlelendire biliwi, jer júzlik hám mámleketimiz social-ekonomikalıq turmısındaǵı waqıyalarǵa óz pikirin bildiriwi, bilim beriwge unamlı qatnas jasawdı rawajlandırıp barıwı kerek.
Ekonomikalıq teoriya páni student jaslardı ekonomikalıq pikirlewge úyrenitiwde házirgi zaman bazar ekonomikasındaǵı ózgerislerdi ańlap jetiwde hám onı túsindiriwde, olardıń sanasına milliy ǵárezsizlik ideyasın hám milliy ideologiyanıń tiykarǵı qaǵıydaların sińdiriwde, ekonomikanı modernizaciyalaw, erkinlestiriw hám reformalardı tereńlestiriw tiykarında házirgi zaman rawajlanǵan bazar ekonomikasın júzege keltiriwdiń aktual mashqalaların ashıp beriwde, ekonomikalıq qatnasıqlar haqqında ámeliy kónlikpeler payda etiwde, jas áwladta jaratıwshańlıq ideyaların qáliplestiriwde, olardıń mádeniy dúnya kóz-qarasın keńeytiwde, ekonomikalıq mádeniyatın kóteriwge ayrıqsha tásir kórsetiwde, Watan hám elimiz keleshegi jolında miynet etiw tuyǵısın qáliplestiriw sıyaqlı wazıypalardı orınlap kelmekte.