Dawletmuratov Adilbay Mirzabaevich

M.Fridmen

Qálegen jámiyettiń rawajlanıwı, eń aldı menen insannıń materiallıq talabın qanaatlandırıwdıń tiykarı ekonomika ekenligi hámmege málim. Ullı keleshegimizdi de joqarı rawajlanǵan ekonomikasız kóz aldımızǵa elesletiw oǵada qıyın. Biraqta ekonomika quramalı sistema bolıp, onıń kóp túrli qırları hám ózinin rawajlanıw nızamları bar. Olardı túsinbey hám ekonomikalıq nızamlardıń talapların ámelde itibarǵa almay turıp hesh bir tarawda jaqsı nátiyjege erisiw múmkin emes. Mine sonlıqtan da házirgi ekonomikanı modernizaciyalaw dáwirinde qánigelerdi, ásirese joqarı maǵlıwmatlı qánigelerdi tayarlawdıń sapasın arttırıwda jámiyetimizde ekonomikalıq pánlerdi, sonıń ishinde ekonomikalıq teoriyanı úyreniwge umtılıw kúsheymekte. Sebebi insan qaysı tarawdıń qánegisi bolıwına qaramastan, ózi jasap atırǵan jámiyettiń ekonomikalıq turmısında bolıp atırǵan jańalanıwlar menen ózgerislerdi ańlap jetiwi , onı biliwi ushın ekonomikalıq bilimler menen qurallanǵan bolıwı kerek. Álbette bunda ekonomikalıq teoriya pániniń tutqan ornı ayrıqsha. Bul pándi úyreniw arqalı ekonomikada kúndelikli tárizde júz berip atırǵan jańalanıwlardı ańlap, onıń rawajlanıw nızamlıqlarınan turmıs mútájliklerin qanaatlandırıw jolında keńnen paydalanıwı múmkin.
Ekonomikalıq teoriya páni mámlekettiń ekonomikalıq siyasatın belgilep beriw menen birge, házirgi ekonomikanı erkinlestiriw sharayatında jaslarımızdıń ekonomikalıq bilimge qızıǵıwshılıǵın qánaatlandıratuǵın tiykarǵı teoriyalıq pán esaplanadı.
Joqarıda keltirilgenlerdi, sonday-aq jańa áwlad lekciya tekstlerin jaratıw hám olardı joqarı bilimlendiriw sistemasına keńnen engiziw, joqarı oqıw orınlarınıń málimleme resurs oraylarınıń fondın jańalap barıw maqsetinde ekonomikalıq teoriya páni boyınsha joqarı oqıw orınlarınıń ekonomikalıq tálim baǵdarları studentlerin ushın bul lekciya tekstleri jaratıldı.
Bul lekciya tekstleri jańa mámleketlik tálim standartları boyınsha dúzilgen hám Ózbekstan Respublikası joqarı hám orta arnawlı bilimlendiriw ministrliginiń 2018-jıl 25-avgusttaǵı 744-sanlı buyrıǵı menen tastıyıqlanǵan “Ekonomikalıq teoriya” pániniń úlgi oqıw baǵdarlaması tiykarında jazıldı.
Bul lekciya tekstleri joqarı oqıw orınlarınıń studentleri hám ekonomikalıq teoriya menen qızıǵıwshı barlıq kitap oqıwshılarınıń ekonomikalıq bilimi hám mádeniyatın kóteriwge xızmet etedi dep úmit etiledi. Lekciya tekstleri boyınsha bildirilgen hár qanday pikir hám usınıslar ushın aldın-ala minnetdarshılıq bildiredi hám keyingi lekciya tekstlerin tayarlawda olardı esapqa aladı.

1-MODUL. EKONOMIKALÍQ RAWAJLANÍWDÍŃ ULÍWMALÍQ TIYKARLARÍ

1.