Dawletmuratov Adilbay Mirzabaevich

Isbilermen dep ekonomikalıq resurslar, yaǵnıy óndiris ásb apları hám jumıs kúshi resurslarınıń, tábiyiy resurslardıń bir-birine birigiwin támiyinleytuǵın, shólkemlestiriwshi, baslamashı, jańalıqqa umtılıwshı, ekonomikalıq hám basqa qáwip-qáterden, juwapkershilikten qorqpaytuǵın adamlarǵa aytıladı. Bul qábiletlerdiń jıyındısı isbilermenlik qábileti dep júrgiziledi. Demek, isbilermenlik qábiletine iye bolıw ushın jańalıqqa umtılıwshı, jańa óndiris texnologiyasın engiziwshi biznesti shólkemlestiriwdiń jańa formaların oylap tabıwshı táwekelshil hám biznes sırın biletuǵın bolıwı kerek.
Óndiris faktorları quramında informaciya ayrıqsha orın iyeleydi. Bul faktor materiallıq yamasa fizikalıq kúsh formasına iye emes, ol túrli maǵlıwmatlar kórinisinde boladı. Málim informaciyaǵa tiykarlanǵan halda óndiris júz beredi, kelgen informaciyaǵa qarap neni, qansha islep shıǵarıw máselesi sheshiledi. Informaciya social-ekonomikalıq, demografiyalıq, tábiyiy-texnikalıq hám siyasiy xarakterge iye boladı hám soǵan qarap óndiris shólkemlestiriledi. Mısalı, baha qımbatlaydı degen maǵlıwmat kelse óndiris keńeyttiriledi, bahanıń páseyiwi kútilse bunıń kerisi boladı. Eger ónimi joqarı texnika bar degen maǵlıwmat bolsa onı qollanıw ilajları kóriledi. Internetten alınǵan maǵlıwmattan paydalanıp ónimdi óz waqtında satıw, kerekli resurslardı satıp alıw hám hátteki sherik tabıw múmkin.

2. Óndiristiń tákirarlanıp turıwı

Sheksiz mútájliklerdi qanaatlandırıw ushın ónim hám xızmetlerdi úzliksiz túrde islep shıǵarıw kerek, sebebi óndiriste úzilis júz berse adamlardıń turmıslıq mútájlikleri qanaatlandırılmaydı. Óndiris bir márte júz bermesten turaqlı jańalanıp, qaytalanıp turadı, nátiyjede tirishilik ónimleri úzliksiz jaratılıp barıladı.