Abbatisa – ayollar katolik monastirlarining boshqaruvchilari. Abbatlik

Konstans sulhi (1183-y) – german imperatori Fridrix I Barbarossa va Lombardiya ligasi oʻrtasida imzolangan sulh. Ushbu sulhga koʻra, Lombardiya ligasi tarkibiga kiruvchi italyan shaharlariga mustaqil ravishda konsullarni saylash vakolati berilgan. Saylangan konsullar keyin imperator tasdigʻidan oʻtgan. Imperatorning Italiyaga yurishi vaqtida boʻlsa ushbu shaharlar unga yordamchi qoʻshinlar taqdim etishi va imperator saroyi ta’minotini amalga oshirishi, oʻz navbatida imperator noqulaylik tugʻdirmaslik maqsadida uzoq muddat qolmasligi belgilandi. Amalda K.S. Lombardiya shaharlarining avtonomiyasini rasmiylashtirib berdi.
“Konstantin tuhfasi” – Rim imperatori Konstantin I ning (306-337) oʻsha paytdagi papa Silvestrga yuborgan ediktini oʻzida mujassam etgan soxta hujjat. Haqiqatda gʻarblik ilohiyotchilar tomonidan papalardan birining koʻrsatmasiga asosan (aftidan Nikolay I) VIII asrning oʻrtalarida yaratilgan. Aytilishicha, Konstantin moxov kasallilgi bilan kasallanib qolgach, unga hech bir malham shifo bermaydi. Shunda majusiy kohinlar imperator soʻnggi chora kattaroq bolalar qoni bilan toʻldirilgan jomda choʻmilish lozimligini aytishadi. Lekin shu maqsadda toʻplangan bolalarni imperator oʻz uylariga tarqatib yuboradi. Kechasi u tushida apostollar – Petr va Pavelni koʻrib, ular kasalligiga da’vo topish uchun Rim yepiskopi Silvestrga murojaat qilishni maslahat berishadi. Konstantin Silvestr tomonidan jomda choʻqintiriladi va darhol tuzalib ketadi. Shunga minnatdorlik nuqtai nazaridan imperator Rim papasiga aylangan Silvestrga butun xristian cherkovi, shu jumladan, Antioxiya, Aleksandriya, Konstantinopol, Quddus yepsikoplari ustidan rahbarlikni beradi. Undan tashqari u oʻzi ketgach Rim papasi Rim, Italiya va “Gʻarb viloyatlarini” olishligini e’lon qilgan. “K.T.” bevosita Pipin Pakana tomonidan Oʻrta Italiyada joylashgan yerlarning (huquqiy jihatdan Vizantiya imperiyasiga tegishli yerlar) Papa davlatiga tortiq qilishi natijasida paydo boʻldi. Ushbu hujjat mazmunida papalar “huquqiy jihatdan” IV ars boshlaridan ularga tegishli boʻlgan yerlarning bir qismini qaytarib olganligi aks etgan. Keyinchalik “K.T.” papalar tomonidan oʻz teokratik hokimiyatini mustahkamlash yoʻlida foydalanildi. XV asrda gumanistlar Nikolay Kuzanskiy va Lorenso Vallalar uning soxtaligini isbotlab berishgan.