1 «Asosiy texnologik jarayonlar va qurilmalar» fanining mazmuni

Ko‘p korpusli bug‘latish qurilmalari.

Muammoli vaziyat savol yoki topshiriq: Kimyoviy ishlab chiqarishlarda eritmalarni bug‘latishda ko‘p korpusli bug‘latish qurilmalaridan foydalaniladi. Bu jarayonda ikkilamchi bug‘ qanday maqsadlarda ishlatiladi? Muammoni yechimini topish uchun tavsiyalar: 1.Mazkur ma’ruzani 18.3- mavzusini o‘rganib chiqib, amaliy masalalar bilan tanishish orqali muammoni yechimini topasiz. 2. Salimov Z. Kimyoviy texnologiyaning asosiy jarayonlari va qurilmalari. Toshkent. O‘zbekiston, 1- tom, 1994y.

Sanoatda eritmalarni quyuqlashtirish uchun ko‘p bug‘latish qurilmalar keng ishlatiladi. Bunday qurilmalar isituvchi bug‘ning issiqligidan bir necha bor foydalanishga asoslangan. Bunda birinchi qurilmaga isituvchi bug‘ berilsa, ikkinchi qurilmani isitish uchun birinchi qurilmadan chiqayotgan ikkilamchi bug‘ ishlatiladi, uchinchi qurilmani isitish uchun esa ikkinchi qurilmadan chiqayotgan ikkilamchi bug‘ ishlatiladi va xokazo. Oxirgi qurilmadan chiqayotgan ikkilamchi bug‘ kondensatorga yuboriladi. Ko‘p qurilmali bug‘latish qurilmalarida isituvchi bug‘ning xaqiqiy sarfi 1-jadvalda berilgan.
1-jadval

Qurilmalar soni	1	2	3	4	5
1 kg suvni bug‘latish uchun bug‘ning sarfi, kg	1,1	0,57	0,4	0,3	0,27

Jadvaldan ko‘rinib turibdiki, qurilmalarning soni ko‘payishi bilan 1 kg suvni bug‘latish uchun zarur bo‘lgan isituvchi bug‘ning sarfi kamayib boradi. Agar bir korpusli qurilmadan ikki korpusli qurilmaga o‘tishda bug‘ning sarfi taxminan 50% ga kamaysa, to‘rt korpusli qurilmadan besh korpusli qurilmaga o‘tishda bug‘ning sarfi 10 % ga kamayadi. Demak, maolum bir aniq sharoit uchun qurilmalarning optimal soni topilishi zarur.