Ўзбекистон Республикасини янада ривожлантириш бўйича Ҳаракатлар стратегияси тўғрисида

Низонинг моҳияти:
Акциядорлик жамияти (бундан буён матнда АЖ деб юритилади) ва масъулияти чекланган жамияти (бундан буён матнда даъвогар деб юритилади) ўртасида 2010 йил 1 майда шаҳар муниципал биржа марказида 1/3-сонли олди-сотди шартномаси тузилган.
Мазкур шартноманинг 1.1-бандида “Савдо ташкилотчиси” томонидан 2010 йил 1 майдаги ўтказилган биржа савдолари баённомасида АЖга тегишли бўлган Жиззах шаҳар, А.Навои кўчаси, 4-уй манзилда жойлашган бино ва иншоотлардан бир қисмини, яъни давлат кадастр хизматининг
2010 йил 20 апрелдаги 54-сонли маълумотномасига асосан умумий майдони 1550 кв.м. бўлган, шундан майдони 900 кв.м. бўлган “Цех” (К-блок) биноси, майдони 400,0 кв.м. бўлган “Цех” (М-блок) биноси ва майдони 250,0 кв.м. бўлган “Шийпон” (Н-блок)га нисбатан даъвогарга мулкий ҳуқуқни бериш шартнома предмети ҳисобланиши белгиланган.
Мазкур объектни топшириш юзасидан АЖ ва даъвогар ўртасида 2010 йил 2 июнда топшириш-қабул қилиш далолатномаси расмийлаштирилган. Шу билан бирга улар ўртасида ўзганинг ер участкасидан чекланган тарзда фойдаланиш ҳақида сервитут шартномаси имзоланган. Ушбу шартномага асосан даъвогар АЖга тегишли бўлган ер участкасидан фойдаланиб, юк автотранспорт воситалари билан олиб келган юкларни “Цех” (К-блок) биносига ўтказиб келган.
Шунингдек, АЖ ва хусусий корхона (бундан буён матнда жавобгар деб юритилади) ўртасида 2015 йил 1 октябрда 1-сонли олди-сотди шартномаси тузилган ва унга кўра АЖга мулк ҳуқуқи асосида тегишли бўлган ва умумий майдони 22 550 кв.м. бўлган ер участкасида Жиззах шаҳар, А.Навои кўчаси, 4-уй манзилда жойлашган бино ва иншоотларини жавобгарга сотган.
Шундан сўнг жавобгар даъвогардан унга тегишли ер участкасидан фойдаланиш учун шартнома тузишни ва ер участкасидан фойдаланиш учун ҳақ тўлашни талаб қилган. Бироқ даъвогар ушбу ер участкасидан фойдаланиш учун жавобгар томонидан сотиб олинган бино ва иншоотларнинг собиқ эгаси бўлган АЖ билан сервитут шартномаси тузилганлигини маълум қилиб, шартнома тузиш ва ер участкасидан фойдаланиш учун ҳақ тўлашдан бош тортган. Даъвогар шартнома тузишдан бош торганлиги сабабли жавобгар даъвогар томонидан ўзганинг ер участкасидан фойдаланишни чеклаб қўйган ва шу сабабли даъвогар судга даъво аризаси билан мурожаат қилиб, даъвогарга ўзганинг ер участкасидан чекланган тарзда фойдаланиш ҳуқуқини (сервитут) беришни сўраган.