Ўзбекистон Республикасини янада ривожлантириш бўйича Ҳаракатлар стратегияси тўғрисида

Низонинг моҳияти:
2017 йил 30 августда Акциядорлик-тижорат банки (бундан буён матнда Банк деб юритилади) ва Масъулияти чекланган жамияти (бундан буён матнда Мижоз деб юритилади) ўртасида “СВОП” валюта операциясини амалга ошириш тўғрисида CВОП-1/2-сонли контракт тузилган ва унга кўра Банк Мижоздан 50 000 АҚШ долларини Ўзбекистон Республикаси Марказий банкининг контракт тузилган кундаги курси бўйича, яъни 1 АҚШ долларини 4 100 сўмдан, жами 205 000 000 сўмга сотиб олган.
Контрактнинг шартларига кўра, валютани қайта сотиб олиш (алмашиш) 2017 йил 10 октябрда Ўзбекистон Республикаси Марказий банкининг қайта сотиб олиш кундаги курси бўйича амалга оширилиши лозим бўлган.
Ўзбекистон Республикаси Президентининг “Валюта сиёсатини либераллаштириш бўйича биринчи навбатдаги чора-тадбирлар тўғрисида” 2017 йил 2 сентябрдаги ПФ-5177-сонли Фармони билан юридик ва жисмоний шахсларнинг чет эл валютасини эркин сотиб олиш ва сотиш ҳамда ўз маблағларини ўзининг хоҳишига кўра эркин тасарруф этиш ҳуқуқларини рўёбга чиқаришни тўлиқ таъминлаш, миллий валютанинг чет эл валютасига нисбатан курсини белгилашда фақатгина бозор механизмларини қўллаш назарда тутилган.
Шу сабабли, Ўзбекистон Республикаси Марказий банки 2017 йилнинг 5 сентябрь кунига миллий валютанинг курсини 1 АҚШ доллари учун 8 100 сўм этиб белгиланган.
Ушбу валюта курсининг ўзгаришини контракт тузиш пайтида олдиндан билмаганлиги, агарда кўра билганида контрактни умуман тузмаслигини асос қилиб Мижоз Банкнинг Амалиёт бошқармаси (бундан буён матнда Банк филиали деб юритилади)га контрактга қўшимча келишувни тузиш тўғрисидаги таклиф билан мурожжат қилган ва у билан валютани қайта сотиб олиш учун 2017 йил 4 сентябрдаги миллий валютанинг курсини, яъни 1 АҚШ доллари учун 4 250 сўмни белгилашни сўраган.
Бироқ Банк филиали қўшимча келишув тузишни рад этган ва шу боис Мижоз туманлаларо иқтисодий судига Банк филиалига нисбатан даъво билан мурожаат қилиб, контрактнинг 2.1-бандини ўзгартиришни ва валютани қайта сотиб олиш учун Ўзбекистон Республикаси Президентининг “Валюта сиёсатини либераллаштириш бўйича биринчи навбатдаги чора-тадбирлар тўғрисида” 2017 йил 2 сентябрдаги ПФ-5177-сонли Фармони қабул қилгунга қадар бўлган миллий валютанинг курсини 1 АҚШ доллари учун 4 250 сўм миқдорда белгилашни сўраган.
Биринчи инстанция судининг ҳал қилув қарори билан даъво қаноатлантириган ва контрактнинг 2.1-бандини ўзгартирилиб, валютани қайта сотиб олиш учун миллий валютанинг курси 1 АҚШ доллари учун 4 250 сўм миқдорда белгиланган.
Суднинг ҳал қилув қарори билан норози бўлган Банк апелляция шикояти билан мурожаат қилган.