Ўзбекистон Республикасини янада ривожлантириш бўйича Ҳаракатлар стратегияси тўғрисида

Низонинг моҳияти:
2015 йил 30 апрелда Масъулияти чекланган жамияти (бундан буён матнда Буюртмачи деб юритилади) ва Хусусий корхона (бундан буён матнда Ижрочи деб юритилади) ўртасида дастурий таъминотни ишлаб чиқиш ва жорий этиш учун 5-сонли шартнома тузилган булиб, унга кўра Ижрочи Буюртмачининг топшириғига асосан корхонанинг хусусиятидан келиб чиқиб ҳисоботни автоматлаштириш учун дастурий таъминотни ишлаб чиқиш ва жорий этиш ҳамда Буюртмачининг ишчиларини дастурий таъминот билан ишлашни ўргатиш мажбуриятини олган.
Шартноманинг шартларига мувофиқ бажарилиши лозим бўлган ишлар (хизматлар)нинг қиймати 100 000 000 сўмни ташкил қилган.
Ушбу шартнома бўйича Буюртмачи томонидан Ижрочига 60 000 000 сўм тўлаб берилган.
Ижрочи томонидан ўз мажбурияти бажарилмаган деб ҳисоблаб Буюртмачи иқтисодий судга Ижрочидан олдиндан тўланган пул маблағларини ундириш тўғрисидаги даъво аризаси билан мурожаат қилган.
Ўз навбатида Ижрочи судга қарши даъво билан мурожаат қилиб, Буюртмачидан 22 600 000 сўм асосий қарз ва тўловни кечиктирилгани учун 55 573 600 сўм пеняни ундиришни сўраган.


Даъвогар (Буюртмачи)нинг важлари:
Шартноманинг иловаси бўлган техникавий топшириқга мувофиқ бажарилиши лозим бўлган ишлар уч қисмдан, яъни бухгалтерия ва омборхонада ҳисобот дастурини, маркетинг ва кадрлар бўлимлар учун дастур ишлаб чиқиш, ушбу дастурларни корхонанинг хусусиятидан келиб чиқиб ҳисоботни автоматлаштириш учун ягона дастурий таъминотга бирлаштириш ҳамда Буюртмачининг ишчиларини дастурий таъминот билан ишлашни ўргатишдан иборат бўлган.
Ишларни бажариш муддати олдиндан тўлов суммаси келиб тушган кундан эътиборан 6 ой этиб белгиланган. Бироқ, ушбу муддатда ишлар бажарилмаган ва Ижрочининг илтимосига асосан шартномага қўшимча келишув имзоланган бўлиб, ишларни бажариш муддати яна 6 ойга узайтирилган. Аммо ушбу муддатда ҳам ишлар тугатилмаган, чунки Ижрочи томонидан фақат маркетинг ва кадрлар бўлимлар учун дастур ишлаб чиқилган.
Бажарилган ишларнинг қисмидан шартноманинг натижаси бўлган корхонанинг хусусиятидан келиб чиқиб ҳисоботни автоматлаштириш учун ягона дастурий таъминотисиз фойдаланиб бўлмайди ва шу сабабли Ижрочи олдиндан тўланган суммани қайтариши лозим.