Ўзбекистон республикаси маданият ва спорт ишлари вазирлиги ўзбекистон давлат жисмоний тарбия институти

II БОБ. ТАДҚИҚОТНИНГ ВАЗИФАЛАРИ, МЕТОДЛАРИ ВА ТАШКИЛ ҚИЛИНИШИ

Боксчиларнинг техник-тактик тайёргарлиги жараёнини такомиллаштириш кўп жиҳатдан тақвим мусобақалари вақтида машғулот жанглари ва олишувларида фойдаланиладиган яккакураш воситаларининг қўлланилиш кўрсаткичларининг объективлаштирилишига боғлиқ бўлади. Машғулотлар ва мусобақаларда асосий ҳаракат турларининг муваффақиятли бўлишидаги фарқлар уларнинг юзага келишини белгилаб берувчи омилларни албатта излаб топиш ва таҳлил қилишни талаб этади.

Шунингдек, кейинчалик спортчиларнинг ҳужум ва ҳимояланиш воситалари таркибига тузатишлар киритувчи ҳамда уларнинг машғулот жангларидан мусобақа шароитларига кўчишини тезлаштирувчи методикаларни ишлаб чиқиш тақозо қилинади.
Бунда ҳаракат турларининг натижалилиги тўғрисидаги маълумотлар билан бир қаторда расмий мусобақалар пайтида жанговар амалиёт ва олишувлар учун хос бўлган машғулот жангларида уларнинг қўлланилиш ҳажмлари ҳам аҳамиятли саналади.
Диссертация ишининг мақсади машғулот жанглари ва расмий мусобақаларда ҳаракат турларининг қўлланилиш кўрсаткичларини ҳисобга олиш асосида ишлаб чиқилган 14-15 ёшдаги боксчиларнинг техник-тактик қуролланганлигини оптималлаштириш методикасини назарий жиҳатдан ҳамда тажрибада асослаб беришдан иборат.
2.1. Тадқиқот вазифалари
Адабиётларни таҳлил қилиш натижалари қуйидаги асосий тадқиқот вазифаларининг танланишини белгилаб берди:

1. 
   Машғулот жанглари ва мусобақаларда асосий ҳаракат турлари таркибидан фойдаланишда ёш боксчиларнинг индивидуал хусусиятларини, шунингдек, ҳаракатларнинг қўлланилиш кўрсаткичлари ўртасидаги ўзаро боғлиқликлар даражасини аниқлаш.
   
2. 
   Ёш боксчилар томонидан машғулотларда ўзлаштирилган ҳаракатларни мусобақа шароитларига кўчириш жараёнини тезлаштиришга йўналтирилган методикани ишлаб чиқиш ва таклиф қилинган методика самарадорлигини тажрибада асослаш.
   

2.2. Тадқиқот методлари
Диссертацияда қўйилган вазифалар қуйидаги тадқиқот методлари ёрдамида ҳал этилди:

1. 
   Илмий-методик адабиётларнинг таҳлили.
   
2. 
   Назарий таҳлил.
   
3. 
   Тажрибани умумлаштириш.
   
4. 
   Педагогик кузатувлар.
   
5. 
   Педагогик тажриба.
   
6. 
   Математик статистика методлари.