Ўзбекистон республикаси маданият ва спорт ишлари вазирлиги ўзбекистон давлат жисмоний тарбия институти

Тадқиқотнинг мақсади: машғулот жанглари ва расмий мусобақалардаги ҳаракат турларининг қўлланилиш кўрсаткичлари асосида ишлаб чиқилган ёш боксчиларнинг техник-тактик қуролланганлигини оптималлаштириш методикасини назарий жиҳатдан ҳамда тажрибада асослаш.
Тадқиқот объекти ва предмети: 14-15 ёш боксчиларнинг техник-тактик қуролланганлиги. Машғулот жанглари ва расмий мусобақаларда ҳаракат турлари ҳамда уларнинг тактик таркибларининг қўлланилиш кўрсаткичлари.
Тадқиқот фарази: шундан иборат эдики, машғулот жанглари ва мусобақаларда яккакураш воситалари ҳамда уларни тайёрлашнинг тактик таркибларининг қўлланилиш кўрсаткичларидаги мавжуд фарқлар, расмий жанглар ва машғулотдаги олишувлар орасидаги вазиятли таркибларнинг бир-бирига мос келмаслиги, ҳамда ҳаракатлар таркибини индивидуаллаштиришга қаратилган кўрсатмаларнинг йўқлиги ҳисобланади. Шу сабабли ўқув олишувларида ўзлаштирилган ҳаракатларнинг қўлланилишини енгиллаштирувчи машғулот воситаларининг таъсир қилиш самарасини ошириш ва такомиллаштириш бевосита мусобақа вазиятларига яқинлаштириш ҳисобига долзарб бўлади.
Илмий янгилиги: тажриба тадқиқотлари маълумотлари асосида шакллантирилган қонуниятлар ёш боксчиларнинг техник-тактик тайёргарлигида қўлланиладиган машғулот жангларининг олиб борилишини баҳолашни объективлаштиради.
Ёш боксчиларда ўқув жанговар амалиёти ва расмий мусобақалардаги ҳаракатлар таркиби ҳамда уларнинг қўлланилиш кўрсаткичларидаги индивидуал фарқлар аниқланди. Ёш боксчиларни машқ қилдириш учун машғулотларда ўзлаштирилган ҳаракатларни мусобақа шароитларига кўчириш жараёнини тезлаштиришга қаратилган амалий тавсиялар ишлаб чиқилди.
Тадқиқот натижаларининг илмий ва амалий аҳамияти. Тадкикот материаллари ёш боксчиларнинг техник-тактик тайёргарлигини жадаллаштириш муаммолари бўйича бокс назарияси ва методикаси бўлимларини тўлдиради. Олинган натижалар ёш боксчиларнинг техник-тактик тайёргарлиги методикасини такомиллаштириш учун шарт-шароитлар яратади. Тадқиқотларнинг асосий натижаларидан ёш боксчиларни тайёрлаш амалиётида, шу қаторда таълим фаолиятида бокс бўйича мутахассисларни тайёрлаш, қайта тайёрлаш ва малакасини ошириш жараёнида фойдаланиш мумкин.