Ўзбекистон республикаси халқ таълими вазирлиги республика таълим маркази

Мақсад: Шуғулланувчиларга сувга тушиш ва сувда нафас чиқаришни ўргатиш.
Ўйинни тафсилоти: Ўйин иштирокчилари иккитадан бўлиб қўлларини ушлаган ҳолда оралиқдаги масофа бир қадам бўлиб бир – бирига қарама – қарши туришади. Ўқитувчининг сигнали бўйича улар ўтириб сувга боши билан шўнғиб, сувда нафас чиқаришади.
Методик кўрсатма. Ўз жойидан қимирлаш ва бошқаларга ҳалақит бериш таьқиқланади. Ўйин 2 дақиқадан ошмаслиги керак.

Сув хоссалари

Сузишнинг асосий техникасига ўтишдан аввал инсон сув муҳити шароитида ҳаракатларини амалга оширадиган сувнинг баъзи хоссаларига тўхталиб ўтиш лозим.
Ҳар бир физик жисм каби сувнинг ҳам оғирлиги бор. Сувнинг солиштирма оғирлиги ҳавонинг бу каби оғирлигидан тахминан 840 маротаба катта. Сув зарралари ўта ҳаракатчан ва катта массага эга, шунинг учун сувда инерция (жисмларнинг ташқи таъсири бўлмаса, тинч ёки текис ҳаракатдаги ҳолатини сақлаш хусусияти) ҳам каттадир. Демакки, сузувчи танасини олдинга итарувчи кучли тортиш кучини ҳосил қилиш учун жадаллашувчи эшкак эшиш пайтидаги каби ҳаракатларни амалга ошириш зарур.
Сув сузувчининг танаси юзасига катта босим ўтказади, демакки, сувда ҳаракатланаётган инсон қаршиликни ҳам ҳис этади. Босим ҳажми сув чуқурлигига боғлиқдир.
Одамнинг сувда ҳаракатланиши суюқликнинг ҳаракат қилаётган жисмга қаршилик кўрсатиш хоссасига асосланади. Мазкур қаршилик сув юзасида ҳаракатланаётган қўллар, оёқлар ва бутун тананинг сувнинг мазкур юзаларга реакцияси (таъсири) кўринишида пайдо бўлади. Шу тариқа, сувдаги сузувчи унга қўллари, оёқлари, бутун танаси билан таянаши ва қарама-қарши кучлар таъсирини юзага келтириши мумкин. Сувда ҳаракатда бўлган танага, шунингдек, кўтариш кучи ҳам таъсир кўрсатади.
Сувнинг яна бир муҳим хоссаларидан бири унинг тўлқинлар ҳосил қилиши ҳисобланади. Мазкур хосса ерга тортилиш кучи, сув муҳитининг эгилувчанлиги ва ҳаракатлилиги мавжудлигига асосланади. Сув юзасида сузувчи ҳаракатланаётганда юзага келадиган тўлқинлар ҳажми унинг техник жиҳатдан ғай даражада тайёргарликка эгалигига боғлиқдир.