Ўзбекистон республикаси адлия вазирлиги тошкент давлат юридик институти шорахметов шоакбар шорустамович

238¹¹-м о д д а. Суд буйруғини ундирувчига бериш


Агар белгиланган муддатда қарздордан судга эътироз туш­маса, судья суднинг муҳри билан тасдиқланган суд буйруғини ижро этишга тақдим қилиш учун ундирувчига беради. Унди­рувчининг илтимосига кўра, суд буйруғи ижро этиш учун бевосита суд томонидан юборилиши мумкин.
Қарздордан давлат божини ундириш мақсадида суднинг муҳри билан тасдиқланган суд буйруғининг алоҳида нусхаси ижро этиш учун бевосита суд томонидан юборилади.

Шарҳланаётган моддада суд буйруғини ундирувчига бериш масалалари ўз ифодасини топган.

1. Суд буйруғи қачонки унинг кўчирма нусхасини олган кундан эътиборан ўн кунлик муддат ичида қарздордан арз қилинган талабга қарши эътироз тушмасагина ижро қилиниши лозим бўлади. Ушбу ҳолда судья суднинг муҳри билан тасдиқланган суд буйру­ғини ижро этишга тақдим қилиш учун ундирувчига беради. Суд­нинг муҳри билан тасдиқланган суд буйруғини иккинчи нусхаси суднинг иш юритувида қолади.
2. Ундирувчининг илтимосига кўра, суд буйруғи ижро этиш учун бевосита суд томонидан юборилиши ҳам мумкин. Суд буйру­ғи шаклида қабул қилинадиган суд қарорлари барча субъектлар учун мажбурий ва Республика ҳудудида сўзсиз ижро этилиши лозим ҳисобланади. Бунда суд буйруқлари бошқа суд ҳужжат­ларидан, уларни ижрога қаратишда, ижро варақасини беришни талаб қилишда фарқ қилади, чунки суд буйруғининг ўзи ижро ҳужжати ҳисобланиб, бевосита ижро этилади.
3. Қарздордан давлат божини ундириш мақсадида суднинг муҳри билан тасдиқланган суд буйруғининг алоҳида нусхаси ижро этиш учун бевосита суд томонидан юборилади. Қонун талабига кўра, қарздорнинг давлат божи миқдори юзасидан келтирган эътирозлари суд буйруғини бекор килиш учун асос бўла олмайди, чунки давлат фойдасига давлат божи ундириш ундирувчи ва қарздор ўртасидаги муносабатларга дахлдор эмас. Фақат асосий талаблар юзасидан билдирилган эътирозларгина суд буйруғини бекор қилиш учун асос бўлади. Шу ўринда Ўзбекистон Респуб­ликаси Олий суди Пленумининг 2006 йил 3 февралдаги “Буйруқ тартибида иш юритишни тартибга солувчи қонун нормаларини қўл­лашнинг айрим масалалари тўғрисида”ги қарорининг 19-бандида тушунтириш берилишича, судлар, суд буйруғини чиқариш ва уни ижрога қаратишда Ўзбекистон Республикаси ФПКнинг 375-модда­си, “Суд ҳужжатлари ва бошқа органлар ҳужжатларини ижро этиш тўғрисида”ги Ўзбекистон Республикаси Қонунининг 8-моддаси ҳамда Ўзбекистон Республикаси Олий суди Пленуми ва Ўзбекис­тон Республикаси Олий хўжалик суди Пленумининг 2009 йил 10 апрелдаги “Суд ҳужжатлари ва бошқа органлар ҳужжатларини ижро этиш тўғрисида”ги Ўзбекистон Республикаси Қонунини қўл­лашда суд амалиётида вужудга келадиган айрим масалалар ҳақи­да”ги қўшма қарорининг 6-9 бандларида баён этилган талабларга асосланишлари лозим.