Ózbekistan respublikasí joqarí HÁm orta arnawlí bilimlendiriw ministrligi

XVII ásir ekinshi yarımında Germaniyanıń siyasiy jaǵdayı. Vestfal` tınıshlıq pitiminen keyingi Germaniyanıń siyasiy kartası júdá ózgeshe edi: dún`yalıq hám diniy húkimdarlardıń jerleri, azat qalalar hám imperiya ricarlarınıń sanı otız jıllıq urısdan aldınǵıǵa salıstırǵanda biraz kóbeydi. Sol waqıtları jılda neshe kún bar bolsa Germaniyada sonsha mámleket bar deytuǵın edi. Tiykarınan mámleketler sanı bunnanda kóp edi. Úsh júzden ziyat knyazlıqlardan tısqarı jáne júzlep rıcarlardıń mayda ǵárezsiz yaki yarım ǵárezsiz jerleri bar edi. Germaniyanıń birligi atına ǵana edi, «German milletiniń muqaddes Rim imperiyası» dep atalıwshı bul mámleket, Vol`ter sózleri menen aytqanda muqaddes hám emes, imperiya da emes hám german milletin birlestirmedi de. Bul puqaralarsız imperiya edi. Saksoniya, Bavariya hám Frankfurttıń puqaraları bolǵan bir waqıtta, german imperiyasınıń puqaraları joq edi. Bul hákimiyatsız imperiya edi, Gabsburglar shańaraǵınan bolǵan imperator óziniń Avstriyadaǵı jerlerinen tısqarı hesh qanday real hákimiyatqa iye emes edi . Bul imperiyanıń mámleketlik shólkemleri joq edi. Imperiya seymi yaki reyxstag hesh qanday juwmaqlawshı qarar qabıl qıla almas, qabıl qılǵanda da onıń qararları hesh qanday áhimiyetge iye emes edi.

Imperator Venada, reyxstag-Regensburgda, imperiya sudı bolsa Veclarda jaylasqan edi. Bunday shárayatta mayda knyazlıqlar ishki hám sırtqı siyasatta ǵárezsizlikke umtılar edi. Olar óz ekonomikalıq ǵárezsizligin bekkemlew ushın hár qanday usıldı maqul kórdi . Mısalı, XVII ásir aqırǵı eliw jılında nemis knyazları Angliyaǵa 46,5 mln funt sterlingke, Franciyaǵa 137 mln livrǵa áskerler satqan. Nemis tariyxshısı Franc Meringtiń jazıwınsha sol waqıtta nemis knyazlarınıń ruwxıy jarlılıǵına, teńsiz pás ketiwine jáhán tariyxınan basqa mısal tabıw qıyın.