Витамин препаратлари

Витамин В₈ (ёки витамин Н) – биотин – себореяга қарши витамин. Терига ранг берадиган пигмент моддаларнинг етарли миқдорда ҳосил бўлишига ёрдам беради, терининг ультрабинафша нурларга нисбатан чидамлилигини оширади. Ёғлар алмашинувида, пироузум кислотасининг оксидланишида қатнашади. Биотин асосан жигарда, ловияда, сутда бўлади. Асосан тери касаллиги – себорреяда қўлланилади.
Витамин В₉ (ёки витамин В_с) – фолат кислотаси (птероилглутаминат кислотаси) 3 та таркибий қисмдан иборат: птеридинли ҳосила, парааминобензоат кислотаси ва L-глутаминат кислотаси. Фолат кислотаси катта миқдорда янги сабзавотларда (салат, шпинат, помидор, сабзи), жигарда, буйракларда, тухумда, пишлоқда ва б. Озиқ-овқат маҳсулотларида сақланади. Шунингдек, ичак микрофлораси томонидан ҳам синтезланади.
Жигарда фолат кислотаси ўзининг фаол кофермент шаклига – 5,6,7,8-тетрагидрофолат кислотасига – айланади. Тетрагидрофолат кислотаси пуринлар синтезида ва билвосита пиримидинлар синтезида иштирок этиб, қатор аминокислоталарнинг айланишларида, гистамин алмашинишида, метионин синтезида (яъни, нуклеин кислоталар ва оқсил метаболизмида) ҳам қатнашади.
Фолат кислотасининг етишмовчилигида макроцитар анемия келиб чиқади. Шунингдек, лейкопения, агранулоцитоз, тромбоцитопения ҳам кузатилиши мумкин. МИЙ шикастланади (глоссит, стоматит, ярали колит, энтерит келиб чиқади).
Фолат кислотаси ингичка ичакда сўрилади. Асосий сўрилган қисми қон зардобидаги оқсиллар билан боғланади. Жигарда катта миқдорда деполанади. Ликворда юқори концентрацияларда аниқланади. Парчаланган маҳсулот-лари буйраклар орқали ажралади.
Фолат кислотаси макроцитар анемияларда, ёш болалар ва ҳомила-дорлар мегалобластик анемияларида, спру касаллигида ва б. ишлатилади.
Витамин В₁₂ (цианокобаламин) – асосан катта миқдорда қорамол жигари ва буйракларида сақланади. Табиатда асосан микроорганизмлар томонидан синтез қилинади. Инсон организмида унинг бундай синтезланиши аҳамиятга эга эмас, чунки у асосан ингичка ичакда сўрилади (йўғон ичакда синтезланади ва шунинг учун ҳам сўрилмайди).
Витамин В₁₂ фаол коферментларининг асосий вазифаси (кофермент В₁₂ ва метилкобаламин) ҳаракатланувчи метил гуруҳлари ва водородни ташишдан иборат. Шунинг ҳисобига оқсиллар ва нуклеин кислоталар алмашинувига таъсир кўрсатади. Бундан ташқари, витамин В₁₂ қон яратилишида, эпителиал ҳужайралар ҳосил бўлишида, нерв тизими фаолиятининг ҳамда ўсиш ва регенерация жараёнларининг амалга оширилишида ҳам иштирок этади.
Цианокобаламиннинг етишмаслигида мегалобластик анемия (пернициоз ёки хавфли анемия, Аддисон-Бирмер анемияси) юзага келади. Шунингдек, МИЙ (тил ёрқин-қизил тусга кириб, силлиқлашади, кимёвий таъсирловчиларга нисбатан ўта сезгир бўлади, меъда шиллиқ қаватининг атрофияси кузатилади, ахилия) ва нерв тизими (парестезиялар, оғриқ сезгилари, юришнинг бузилиши) ҳам шикастланади.
Цианокобаламин (“Каслнинг ташқи омили”) ингичка ичакда сўрилади. Бу унинг меъдада “Каслнинг ички омили” билан ўзаро таъсирлашганидан кейин юз беради. Ички омил гликопротеин бўлиб, цианокобаламиннинг абсорбцияси учун зарур. Унинг қандайдир сабаблар билан етишмаслигида цианокобаламинни парентерал киритиш лозим. Цианокобаламин қон зардобида асосан оқсиллар билан боғланган ҳолда бўлади. Катта миқдорда жигарда деполанади. Асосий қисми ҳазм йўли безлари (асосан ўт) ва қисман буйраклар орқали ажралади.
Препарат беморлар томонидан яхши кўтарилади. Баъзида қон ивувчанлигининг ортиб кетишига олиб келади. Эритроцитлар ва лейкоцитлар миқдо-рининг меъёрдан ортиб кетишида препаратнинг дозаси камайтирилади.