Витамин препаратлари

I. Сувда эрийдиган витаминларнинг препаратлари
1. Витамин В₁ (антиневритик витамин – аневрин) – тиамин
2. Витамин В₂ (ўсиш витамини) – рибофлавин
3. Витамин В₃ ёки Витамин РР (антипеллагрик витамин) – ниацин, никотинат кислота
4. Витамин В₅ (антидерматит таъсирли витамин) – пантотенат кислота
5. Витамин В₆ (антидерматит таъсирга эга – адермин) – пиридоксин
6. Витамин В₈ ёки Витамин Н (себореяга қарши) – биотин
7. Витамин В₉ ёки Витамин В_с (антианемик) – фолат кислотаси
8. Витамин В₁₂ (антианемик) – цианокобаламин
9. Витамин В₁₃ – орат кислотасининг калийли тузи
10. Витамин В₁₅ – пангамат кислотаси
11. Витамин С (антискорбут, цингага қарши (антицингот) витамин) – аскорбинат кислотаси
12. Витамин Р (капиллярлар деворини мустаҳкамловчи ва ўтказувчан-лигини яхшиловчи витамин) – рутин
13. Витамин U (ярага қарши) – метилметионин сульфоний
14. Витамин F
II. Ёғда эрийдиган витаминларнинг препаратлари
1. Витамин А (антиксерофтальмик витамин) – ретинол (каротин)
2. Витамин Д (антирахитин – антирахитик фактор) – кальциферол
3. Витамин Е (кўпайиш витамини – антистерил витамин) – токоферол
4. Витамин К (антигеморрагик фактор) – нафтохинон
СУВДА ЭРУВЧИ ВИТАМИНЛАРНИНГ ПРЕПАРАТЛАРИ
Бу гуруҳга кўпчилик витаминлар киради, жумладан В гуруҳи витаминлари, витамин С ва б.
Тиамин (витамин В₁) катта миқдорда буғдой маҳсулотларида, шолида, нўхотда, хамиртурушда ва бошқа ўсимлик ҳамда ҳайвон маҳсулотларида мавжуд. Тиамин ичакдан сўрилиб, фосфорланади ва тиаминпирофосфатга айланади.
В₁-гиповитаминози полиневритлар, мушаклар бўшашиши ва сезувчанликнинг бузилишига олиб келади. Оғир ҳолатларда парезланиш ва фалажланишлар келиб чиқади (бери-бери касаллигида). Юрак-қон томир тизими фаолияти ҳам бузилади. Баъзан тахикардия, юрак кенгайиши (дилатацияси) ва шишлар билан кечувчи юрак етишмовчилиги кузатилади. Диспептик бузилишлар ҳам юзага келиши мумкин.
МИЙ дан ёмон сўрилади. Парентерал (м/и) киритилганда етарли даражада юқори биоэришувчанликка эришилади. Тиамин маълум миқдорда тўқималарда деполанади. Соф ҳолда ва метаболитлари буйраклар орқали ажратилади.
Амалиётда тиамин бромид ва тиамин хлорид препаратлари (ичишга ва парентерал) қўлланилади. Улар тиаминнинг етишмовчилигида, невритларда, невралгияларда, парезларда, радикулитда, айрим тери касалликларида, шунингдек, МИЙ ва юрак-қон томир тизими патологик ҳолатларида ишлатилади.
Токсик самаралар кузатилмайди, айрим пайтларда аллергик реакциялар юзага чиқиши мумкин.
Кокарбоксилаза (тиаминпирофосфат, котиамин) тиаминнинг дифосфорли эфири бўлиб, карбоксилазанинг коферменти ҳисобланади. АТФ ҳосил бўлишини оширади, калий ионларининг миокард ҳужайраларига ўтишини меъёрлаштиради, қонда қанд миқдорини камайтиради, инсулин фаоллигини оширади. Юрак ритмининг бузилишларида, тож томирлар етишмовчилигида, ҳар хил келиб чиқишга эга бўлган ацидозларда, қандли диабет билан боғлиқ бўлган коматоз ва прекоматоз ҳолатларда ишлатилади. В₁-гипо- ва авитаминозларида тавсия қилинмайди. М/и ва в/о киритилади.