«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Прогноз. Қисқа вақт ичида умумий қоннинг учдан бир қисмининг йўқотилиши хавфли ҳисобланади, кўпинча қоннинг ярмининг йўқотилиши ўлимга сабаб бўлади.
Даволаш. Биринчи навбатда қон кетиши тўхтатилади ва йўқотилган қоннинг ўрнини тўлдириш ҳамда қон ишлаб чиқарилишини кучайтиришга қаратилган даволаш муолажалари ўтказилади. Ички қон кетиши ва геморрагик диатезларни тўхтатиш мақсадида вена қон томирлари орқали 10%-ли кальций хлорид, 10%-ли тиббиёт желатинаси, фибриноген, викасол, этамзилат, 5%-ли аскорбин кислотаси юборилади. Маҳаллий қон кетишини тўхтатиш мақсадида 0,1%-ли адреналин эритмаси тавсияномасига кўра қўлланилади.
Тиббиёт желатинаси - 10%-ли эритма ҳолида вена қон томирига 0,5-1,0 мл/кг дозада; викасол - оғиз орқали от ва қорамолларга – 0,2-0,4 мг/кг; итларга – 1,5-2,0 мг/кг дозада кунига 2 марта; мускул орасига 1%-ли эритма ҳолида от ва қорамолларга – 1-3 мл; ит ва мушукларга – 0,1-0,3 мл бир кунда 2-3 марта; Этамзилат - бир кунда 3-4 марта, 3-4 кун давомида оғиз орқали тавсия этилади.
Қон ишлаб чиқарилишини рағбатлантириш мақсадида оғиз орқали темир сақловчи препаратлардан темир глицерофосфат, лактат, сульфат ёки феррамид, феррокаль, гемостимулин оғиз орқали отлар ва қорамолларга 2-5 мг/кг; итлар, мушуклар ва қўёнларга – 6-10 мг/кг дозада бир кунда 3 марта, ферроплексь кобальт, мис препаратлари ва бошқалар, ҳамда парентерал йўллар билан ферроглюкин, аскорбин кислотаси, В₁₂ витамини қўлланилади. Оғиз орқали фолат кислотаси тавсия этилади. Гўштхўр ҳайвонларга пиширилмаган жигар бериш яхши натижа беради.
Кўп миқдорда қон йўқотилганда ўрин тўлдирувчи воситалар сифатида стабиллаштирилган шу турга мансуб ҳайвон қони, плазма, қон зардоби катта ҳайвонларга 1-3 л, майда ҳайвонларга 200-500 мл вена орқали юборилади. Шунингдек, 0,9%-ли натрий хлорид эритмаси, Рингер-Лок эритмаси, аскорбин кислотаси билан глюкоза эритмалари, гемодез каби плазмани ўрнини тўлдирувчи эритмалар 1 л/5-10 дақиқа тезликда, 10 мл/кг дозада; Полиглюкин, реополигликин кабилар тавсия этилади.

43. Сигирга.

Rp.: Sol. Gelatinae 10% - 150,0
Sol. Adrenalini 0,1% - 0,5
M.f. solutio steril.
D.S. Вена қон томирига. 1 марта инъекция учун. Қон кетиши давом
этганда инъекция шу дозада 3 кун давомида қайтарилиши
мумкин.

44. Қўйга.

Rp.: Haematogeni fluidi 250,0
D.S. Оғиз орқали. Кунига 15 мл.дан 3 марта, 6 кун давомида сув
билан бериш учун.