Тошкент кимё –технология институти силикат материаллари ва нодир, камёб металлар технологияси кафедраси

2 – МАЪРУЗА. ЭЛЕКТРОЛИТЛАР ТАЙЁРЛАШ.


Электролитлар тайёрлаш. Руда ёки концентратларни куйдириш жараёнидан сўнг махсус сувли реагент ёки ишдан чиққан электролит ёрдамида ишлов ўтказилади ва хосил бўлган эритма кераксиз моддалардан тозаланади.
Руда ва концентратларни куйдириш. Рудани куйдириб, таркибидаги асосий бирикмани реагентли ишловда осон эритмага ўтувчан холатига ўтказилади.
Куйдириш мураккаб кимёвий пирометаллургик жараён бўлиб, маъдан таркибидаги бирикмалар иложи борича сувли эритмаларда осон эрувчан бирикмаларга айлантирилади.
Куйдириш қуйидагича турланади: - оксидловчи куйдириш – сульфидлар сульфатлар ёки оксидлар холига ўтади;- қайтарувчи куйдириш–юқори оксидлар қуйи оксидларга ўтади; - хлорловчи куйдириш – оксидлар хлоридлар холига ўтади ва осон эрийди.
Куйдириш жараёни қуйидаги ўтхона (печь) ларда олиб борилади:
- горизонтал;
- найсимон;
- шахтали;
- кўп қаватли;
- қайнатувчи қатламли;
- вихрли (айланувчи).
Қайнатувчи ёки айлантирувчи қатлам хосил қилувчи ўтхоналарда руда кукунига пастдан махсус газ юборилади. Газнинг таркиби, тезлиги ва харорати рудага мос қилиб танланади. Руда кукунини юқори босимли газ муаллақ тутиб, куйдириш жараёнининг тўлиқ содир этилишига эришилади.
Оксидловчи куйдириш таркибида сульфатлар ва сульфидлар тутган маъданларда олиб борилади, газ – реагент сифатида тозаланган хаво, баъзи холларда кислород билан тўйинтирилган хаво хам ишлатилади.
Қайтарувчи куйдириш таркибида металларнинг юқори оксид бирикмалари мавжуд маъданларда ўтказилади, газ – реагент қилиб эса металлургик ёки коксо-кимё ўтхоналарининг газлари, табиий газ, водород ва ҳоказолар ишлатилади.
Хлорловчи куйдириш жараёни таркибида қийин эрувчан оксидли бирикмалар ушловчи маъданларда амалга оширилади.
Куйдириш жараёнига газлар 0,2 – 0,3 МПа босимда юборилади.
Қайновчи қатламли печларда руда ёки концентрат майин кукун холида (0,1 – 2,0 мм) эканлиги учун куйдириш жараёни нисбатан тез ва тўлиқ амалга оширилади. Бу печларнинг камчилиги уларда ўта майин руданинг тахминан 40% хавога учирилади.
Бунинг олдини олиш мақсадида қурилманинг юқори қисмида чанг тўплагичлар ўрнатилиб, йўқотилиши мумкин бўлган руданинг 90% жараёнга қайтарилади.
Вихрли печларда газ-реагентнинг тезлиги юқори бўлганлиги учун кўпроқ сонли чанг тўплагичларни кетма-кет қилиб ўрнатилади.

Қайнатувчи қатламли (а) ва вихр (айлантирувчи) қатламли (б)
печлар чизмалари.