Тема: Анатомия панинин классификациясы рауажланыу тарийхы хам уйрениу методы

Iyin súyegi

Iyin súyegi (os humerus) uzın tútikshe tárizli súyek onıń denesi diafizi hám eki ushı-epifizi boladı. Anatomiyalıq buwınınıń sırtqı tárepinde úlken hám kishi dóńsheler bolıp olardıń ortasında qarıqta jaylasıp ol dóńshelerara qarıqsha dep ataladı. Dóńshelerdiń sońında gedir-budırlıqlar bolıp olarǵa bulshıq etler birigedi. Súyek denesiniń joqarǵı tárepi tsilindr tárizli tómengi tárepi úsh múyeshlik túrinde boladı. Iyin súyeginiń tómengi keńeygen ushı eki tárepinen gedir-budır tóbeshe payda etip tamamlanadı. Bularǵa bulshıq et hám baylamlar jabısadı. Bul eki tóbeshe arasında bilek súyekleri menen birlesetuǵın buwın júzleri jaylasqan, medial tárepinde shıǵanaq súyegi menen birlesetuǵın túte-kórinisli, leterial tárepinde bilek súyegi menen birlesiw ushın yarım sharǵa usas buwın júzi basshası bar. Tómengi ushınıń arqa tárepinde shıǵanaq súyeginiń ósigi kirip turatuǵın shıǵanaq shuqırshası boladı. Aldınǵı tárepinde bolsa shıǵanaq súyeginiń taj ótkir ósigi (bilek búgilgende) kirip turatuǵın taj ótkir oyıǵı bar. Súyektiń hár jerinde qan tamırlar ótetuǵın tesikler ushırasadı.
Bilek súyekleri eki bilek hám shıǵanaq súyeginen ibarat.

Shıǵanaq súyegi

Shıǵanaq súyegi (ulnae) qoldıń medial tárepinde jaylasqan bolıp joqarǵı bólimi biraz keń onda yarımay tárizli oyıq boladı. Shıǵanaq súyegi yarımay tárizli buwın oyıǵınıń joqarısında shıǵanaq ósigi tómeninde ótkir ósik jaylasqan, laterial tárepinde bilek súyeginiń bası kiriwi ushın shuqırsha bar. Shıǵanaq súyegi yarımay tárizli buwın oyıǵı járdeminde iyin súyeginiń túte tárizli buwın júzine birigedi. Shıǵanaq súyeginiń denesi úsh qırlı bolıp bilekke qaraǵan laterial qırı ótkir boladı. Bul súyektiń tómengi ushında basshası ajıratılıp onıń arqasında biz tárizli ósik jaylasqan.

Bilek súyegi

Bilek súyegi (radius) joqarǵı ushı domalaq kórinistegi bassha payda etedi. Basshanıń joqarǵı bólimi batıq bolıp oǵan iyin súyeginiń tompaǵı birigedi. Bilek súyegi basshasınıń tómengi bólimi jińishke moyın payda etedi. Moyınnıń astında aldınǵı júzinde iyinniń eki baslı bulshıq eti kelip birigetuǵın úlken dóńshe bar.
Denesi úsh qırlı bolıp ishki qırı ótkir boladı. Distal epifizi biraz keńeyip birinshi qatarda jaylasqan alaqan súyekleri menen birigiw ushın buwın shuqırshasın payda etedi.
Bilek súyeginiń ishki tárepinde shıǵanaq súyeginiń bası menen birigiw ushın buwın júzi payda bolǵan shetki tárepinde bolsa biz tárizli ósik jaylasqan
Shıǵanaq hám bilek súyekleri joqarǵı hám tómengi bólimleri menen tsilindr tárizli buwın payda etip birigedi.