Таълим вазирлиги тошкент кимё-технология институти й.Қ. ҚОдиров, Д. А. Равшанов, А. РЎзибоев

10-§. Узлуксиз ишловчи аппаратларда мойларни экстракциялаш


Экстракцияланаётган материални эритувчида чўктириш усули билан ишловчи экстракторлар. Бу турдаги экстракторлар асосан икки хил бўлади: вертикал шнекли ва минорали экстракторлар. МДҲ да вертикал шнекли экстракторларнинг асосан уч хил тури кенг қўлланилади: НД-1000, НД-1250 ва НД-1250М моделлари. Бу ускуналарнинг барча ишчи органлари бир хил, фақат корпуснинг ички диаметри ҳар хил: 1000 ва 1250 мм. Ҳозирги кунда ёғ-мой корхоналарида асосан НД-1250 экстракторлари энг кўп тарқалган экстракторлардир.
Биринчи серияли НД-1250 экстрактори пахта чигити ва кунгабоқар уруғи бўйича кунига 340 т ишлаб чиқариш қувватига эга бўлган. Экстрактор модернизация қилинганда унинг конструкциясида қуйидаги асосий ўзгаришлар амалга оширилган:

1. 
   Зеерли фильтр-цедилкаси ўрнига декантатор ўрнатилган. Бунда охирги мисцелла экстракцияланаётган материал қатлами орқали ўтиб фильтрланади ва ундаги заррачалар чўкади.
   
2. 
   Экстракцион колонна баландлиги 2,0-2,3 м га оширилган, бу эса шротнинг бензин сиғимини стабиллаштиради ёки бироз камайтиради (29-32%), эритувчи напорини кўтаради ва экстракция жараёнини гидродинамик шароитини яхшилайди.
   
3. 
   Мисцелла рециркуляцияси ва прессланиб қолган материални ювиш ўзини ўзи тозалайдиган пуркагичлар ёрдамида амалга оширилган.
   

НД-1250 экстракторини модернизациялаш унинг унумдорлигини 340 т/кун дан 400 т/кун гача оширади, бу эса экстракция линиясини бошқа қисмларини ҳам ўзгартиришни талаб этди. Масалан, шнекли буғлаткичларда секциялар сони олтитадан саккизтагача оширилди, мисцеллани дистилляциялаш эса икки босқичлидан уч босқичлига ўтказилди.
Модернизация қилинган НД-1250 линияси биринчи бўлиб 1972-1973 йилда қурилган заводларда жорий қилинди, бу эса заводларга қуйидаги имкониятларни берди:

• 
  Цехнинг қуввати 18%гача ошди,
  
• 
  Электрэнергия сарфи 10%гача, эритувчи сарфи эса қайта ишланаётган уруғга нисбатан, тоннасига 1,5 кг га камайди.
  
• 
  Экстракция цехидаги меҳнат унумдорлиги 20%га ошди.