Sapar Xojaniyazov(1910–1983)

Rima Adikova (1930-2007) Tórtkúl qalasında tuwıladı. Kórkem ónerge júdá jaslayınan qızıǵıp, mektepte oqıǵan waqıtlarınan baslap háweskerler dógeregine qatnasıp, shoq oyınları menen tanıla baslaydı.
1944-jılı Qaraqalpaq mámleketlik muzıkalı teatrına balet artistı bolıp jumısqa keledi. Sońınan teatrdıń bas baletmeysteri lawazımında isleydi. Balet artisti hám aktrisa sıpatında xalıqqa xızmet etip, teatr menen ajıralmas baylanısta bolıp, saxnada uzaq jıllar pidayı xızmet etedi. Ol tuwrı sózli, haqıyqatlıqtı búkpey aytatuǵın insan sıpatında jámáát arasında ayrıqsha húrmetke iye edi.
Ol sanalı ómiriniń 40 jılǵa shamalas dáwirin saxnaǵa baǵıshladı. Ol barlıq kúsh jigerin, júrek yoshın, ózi dóretken postonovkalarında, oynaǵan oyınlarında, janlı obrazlarında sáwlelendirip, tamashagóylerdiń alǵıslarına, xalıqtıń húrmetine miyassar boldı.
Onıń dóretken «Súymegenge súykenbe»de – Parshagúl, «Ǵárip Ashıq»ta – Húrliqa, «Tortyuf»ta – Mariya, «Dayılı jiyenler»de – Dilbar, «Qırıq qız»da – Sarbinaz, «Qáyin ene»de (muzıkalı komediya) – Minayım, «Axmaq patsha»da – Gúlnar, «Qádirdan doktor»da – Qundız, «Manan biy»de – Sharipa, «Ovod»da – Yuliya, «Bir úyde eki ómir»de – Sáwle hám basqa da kóplegen spektakllerdegi jaratqan obrazları teatr tamashagóyleriniń yadında umıtılmas bolıp qaldı.
Rima Adikovanıń kórkem ónerimizdi rawajlandırıwǵa qosqan úlesleri húkimetimiz tárepinen ádil bahalanıp, ogán 1954-jılı Qaraqalpaqstanǵa xızmet kórsetken artist, 1957-jılı Qaraqalpaqstan xalıq artisti, 1969-jıl Ózbekstanǵa xızmet kórsetken artist húrmetli ataqları berildi. Ol bir neshe mártebe Ózbekstan hám Qaraqalpaqstan Respublikaları húrmet jarlıqları menen sıylıqlandı.
Xanım Saparova (1936-2005) Kegeyli rayonında tuwıladı. Ol jaslayınan kórkem ónerge ıqlas qoydı, mektepte oqıp júrgen gezlerinde háweskerler dógeregine belsene qatnasıp jaǵımlı qosıqları menen Qatar qurbıları arasında ayrıqsha itibarǵa iline basladı. Keyin ala onıń kórkem ónerge bolǵan qızıǵıwshılıǵı Nókiske házirgi Berdaq atındaǵı qaraqalpaq mámleketlik akademiyalıq muzıkalı teatrınıń saxnasına alıp keledi.
1956-jılı ol usı teatrǵa aktrisa bolıp jumısqa ornalasadı. Sol dáwirden baslap húrmetli dem alısqa shekem ol teatrdan qol úzbey, saxnada pidayı xızmetler etedi. Ol sanalı ómiriniń40 jılǵa shamalasın saxnaǵa baǵıshlaydı. Nátiyjede xalıqtıń húrmetine, tamashagóylerdiń esap-sanaqsız alǵıslarına miyassar boldı. Ol teatr saxnasında qoyılǵan túrli janrlardaǵı spektakllerde hayal-qızlardıń ráńbáráń obrazların jaratıp xalıqqa inam etti. Onıń oynaǵan «Súymegenge súykenbe»degi – Aysánem, Parshagúl, «Gárip Ashıq»taǵı – Shaxsánem, «Qozı kórpesh - Bayan sulıw»daǵı – Bayan, «Kúygelek kózli yar»daǵı – Dilara, «Jaylawda toy»daǵı – Gúlsánem, «Qırıq qız»daǵı – Gúlayım, «Qáyin ene»degi – Afat, «Axmaq patsha»daǵı – Gúlim, «Jınayatshı kim»degi – Názigúl, «Kelinler qozǵalanı»ndaǵı – Bashorat, «Saq ǵarǵa saǵagınan»daǵı – Netayxan, «Muhabbatı gozzallıq»taǵı – Perdesh, «Jetinshi papam»daǵı – Qarshıǵa, «Bir úyde eki ómir»degi – Biybigúl hám basqa da kóplegen spektakllerdegi teńI tayı joq ráńbáráń tákirarlanbas obrazları qaraqalpaq teatr mádeniyatına qosılǵan salmaqlı úles boldı.
X.Saparovanıń teatr kórkem ónerimizdi rawajlandırıwǵa, onı pútkil keń jámiyetshilikke úgit-násiyalawda qosqan úlesleri húkimetimiz hám xalqımız tárepinen óz dáwirinde ádil bahalanıp, oǵan Qaraqalpaqstanda xızmet kórsetken artist, Qaraqalpaqstan xalıq artisti, Ózbekstanǵa xızmet kórsetken artist húrmetli ataqları berildi.