Sapar Xojaniyazov(1910–1983)

Islam Alibekov (1945-2008). Teatr saxnasında ayanbay xızmet etken, joqarı shólkemlestiriwshilik qábiletine iye talantlı teatr xudojnigi I.Alibekov 1945-jılı Qıtay xalqı respublikasınıń Shınjan Uyǵur avtonomiyalı oblastınıń Chuguchak qalasında oqıtıwshı shańaraǵında dúnyaǵa keledi. Ol 10 jasqa kelgende ata-anası menen birge Qazaqstan Respublikasına kóship keledi. 1969-jılı Alma-ata qalasındaǵı súwretshilik kórkem óner uchilishesin pitkerip, óz miynet jolın Qazaqstan mámleketlik jas tamamshagóyler teatrında saxnalastırıwshı xudojnik bolıp jumıs islewden baslaydı.
1973-jılı Qaraqalpaqstan Respublikası mádeniyat isleri ministrliginiń ótinishi menen Islam Alibekov 3 jılǵa shártnama tiykarına Qaraqalpaq teatrına jumısqa shaqırıladı. Biraq bul 3 jıllıq shártnaması Islam Alibekovtıń ómiriniń aqırına shekem dawam etedi. Ol 40 jılǵa shamalas qaraqalpaq teatrında dóretiwshilik penen shuǵıllanadı.
Teatrǵa keliwi menen onıń qaraqalpaq xalqınıń mádeniyatı, úrp-ádeti, dástúrleri menen jaqsı tanısıp, qaraqalpaq kórkem ónerine bolǵan qızıǵıwshılıǵı artadı. 1974-jılı T.Qayıpbergenovtıń «Qaraqalpaq qızı» romanı boyınsha qoyılǵan «Jumagúl» muzıkalı dramasına jasaǵan dekoraciyası ushın sol jılı awqam mádeniyatı ministrliginiń ayrıqsha sıylıǵın alıwǵa erisedi. 1995-jılı ÓzbekstanRespublikasında ótkerilgen «Nawrız-95» atlı teatrlar arasında ótkerilgen festivallarda S.Balǵabaevtıń «Eń sulıw kelinshek» spektakline islengen dekoraciyası bolsa, usı festivalda 1-orındı alıwǵa miyassar boladı.
Qaraqalpaq teatrında zamanlasları N.Ańsatbaev, Q.Abdireymovlar menen birgelikte ólmes shıǵarmalar jaratıp «Abu Rayxan Beruniy», «Berdaq», «Kelin», «Ay tuwılǵan túnde», «Jaralı júrekler», «Atı óshsin», «Arbań awdarılmasın», «O dúnyaǵa mirát», «Súymegenge súykenbe», «Bizler de ashıq bolǵanbız», «Eń sulıw kelinshek», «Bir úyde eki ómir», «Qáyin ene», «Alpamıs» h.t.b. spektakllerge dekoraciyalar isleydi. Ol qaysı xalıqtıń shıǵarmasın saxnaǵa alıp shıqpasın, sol xalıqtı jaqsı úyrenedi hám tariyxtı jasqsı biletuǵın jetik bilimge iye xudojnik boldı.
Házirgi waqıtta qaraqalpaq mámleketlik jas tamashagóyler teatrınıń bas xudojnigi Barlıqbay Aytmuratov, teatrımızdıń xudojnigi Zawqı Saypovlar I.Alibekov penen birge islesken kóp nárselerdi ustaz xudojnikten úyrengen shákirtleri bolıp esaplanadı.