Saodat sadirova

Yovvoyi echkilar terisi - yovvoyi echki, jayron, tog' echkisi va sayg'oqlar terisidir. Tog' echkilari terisining gistologik tuzilishi dasht echki terilariga yaqin, sayg'oqlar terisining maydoni taxminan 60-100 dm². Faqat unda yog' miqdori kamroq. Voyaga yetgan hayvonlarning terisi o'rtacha 60-80 dm² maydonga ega. Ular dasht echki terilari kabi ishlatiladi. Ularning terisi yupqaroq, qalinligi bo'yicha nisbatan tekis, dermasi pishiqroq. Asosan uzun, sinuvchan qil sochlardan tashkil topgan, qalin jun qoplami bilan farq qiladi. Sayg'oq terilaridan ko'proq yuqori sifatli qo'lqop charmi ishlab chiqarishda foydalaniladi.
Echki terilarida hayot davridagi nuqsonlar tirnalishlar, chechak cho'tiri, qoraqo'tir, tikanli o'tlarning teriga kirishidan hosil bo'lgan teshiklar, qirchang'i kabilardan iborat. O'lgandan keyin terini shilish, saqlash va tashishdagi zararlanishlar uchraydi.
Echki terilari jun qoplamining mustahkamligi va dag'alligi tufayli, ba'zi hayot davridagi nuqsonlarni aniqlash qiyin. Bu teri nuqsonlari va navini aniqlashni murakkablashtiradi.
2.6. YOVVOYI QO'SHTUYOQLILAR TERILARI
Los terilari - qimmatli charm xomashyosi hisoblanadi. Ular katta o'lchamli bo'lib, maydoni 200 dan 400 dm² gacha. Yoshiga qarab qalinligi 3,5-5 mm gacha bo'ladi. Erkak los terilari urg'ochisinikiga qaraganda qalin va pishiqroq. Ushbu terilardan yumshoq, mustahkam zamsha, shuningdek, sport buyumlari uchun xromli oshlangan charm ishlab chiqariladi. Qalin terilar tag charm ishlab chiqarishda foydalaniladi. Los terilarini qabul qilish va navlarga ajratish yirik shoxli mollarning terilari singari olib boriladi.
68
Bug'u terilari - charm ishlab chiqarishda unchalik katta ahamiyatga ega emas, chunki ularning bosh soni ko'p emas. Pishiq va dag'al junli bug'u terisi zamsha ishlab chiqarishda qo'llaniladi. Yovvoyi va xonaki shimol bug'ulari terilarining tovar texnologik xossalari deyarli bir xil. Bug'u terilari fiziologik belgilariga qarab ikki guruhga bo'linadi: birinchi guruh - buzoq terilari, ikkinchi guruh - voyaga yetgan bug'u terilari.