Раќим соли бођдонли

«Сирдарё» газетаси, 1965 йил 24, 27, 29 июль
сонларида босилган.

ҚАТРАЛАР

Асов
Асов отни ишга йўллаши учун отбоқар анча тадбиркор бўлиши лозим.
Баъзан инсонларга нисбатан ҳам «асов» тушунчаси қўлланиб қолади. Ақл-фаросатли асовлардан чўчимаса ҳам бўлади, улар оқимни тезда фаҳмлаб халққа ёндашади ва фаолияти анча самара беради. Сал фаросатдан ҳам маҳрум, лекин «асов»ликни ўзига эп билганлардан эҳтиёт зарур. Бундайлар қилиғи «асов» отга эмас, «асов» итга яқиндир. Эгасини ҳам танимай қолади…
Қадр
Толе кимга кулади, уни келажак кўрсатар. Қинғир иш қирқ йилдан кейин ҳам билинганидек, тер тўкиб қилинган меҳнатнинг қадри англанмай қолмас.
Ғовлаган ғўза
Нолойиқ шахсни мансабга кўтариш, ғўзани ғовлатиб, ҳосил кутиш билан баробар .
Ортиқча ҳавас
Баъзан товуқ ҳам хўроз бўлиб қичқирмоқни ҳавас қилади, лекин қанча чиранмасин «қо-қо-қо»дан нари ўтмайди.
Асалга нима етсин
Шакар ширинлик ичида тотли, лекин таъми сал тахир бўлса ҳам асалга нима етсин.
Жоду
Ёғдуга маҳлиё бўлган киши, у билан кўпинча ёнма-ён юргувчи ва қофиядош сўз жодуни сезмай қолиши турган гап. Афсонавий Фарҳод ҳам шунинг қурбони бўлган.
Телба
Телба кишини кўрганда, айрим қилиқларидан бехосдан кулгинг қистайди. Шунда ҳам ўзингни тутиб, унга ачиниш ҳисси билан қарайсан. Бунинг боиси бор. Ўзинг ҳам телба бўлишдан чўчийсан. Баъзан телбанинг айрим қилиқлари хуш ёққандек бўлади. Чунки телба ўз ёдига келган ҳамма нарсани – у қабиҳликми, риёкорликми қўрқмасдан очиб ташлайди. Шундай пайтда, дилингда борини айтиб солишга истеҳола қилиб юрганингдан телбага тан бермай иложинг йўқ. Балки унинг ўрнида бир дақиқа бўлса-да, ўзингни кўргинг келади. Қандай яхши-я, қалбинг кемираётган дардларингнинг ҳаммасини айтиб солардинг. Ҳақиқатни айтганинг учун телба деб қўя қоларди. Ўйга толасан, Шекспирнинг буюклиги кўз олдингга келади. У ўз севимли қаҳрамони Ҳамлетни ҳақиқатни англатиш ва очиб ташлаш учун, кишилар наздида, телба ҳолга туширмаганмиди?!.