Раќим соли бођдонли

2006-03-21


ГЎЗАЛ БОҒДОН

Меҳрим тошқин, бугун яна –

Мадҳинг куйлай, қўлда торим.
Бағринг жўшқин, тўй-тантана,
Куйлаб айтай дилда борим.
Нақорат:
Қадимий ном – азал Боғдон,
Номга монанд гўзал Боғдон.
Она манзил – оромижон,
Номингга бу ғазал Боғдон.

Тоғу тош ҳам қир ва дала –

Жонбахшида, хушҳол эди.
Авжи парда – тўйда ялла,
Чапак чалган ниҳол эди.
(Нақорат)
Қўшиқ-куйга ҳамдам яйра,
Тоғ қўйнида жаннат ўзинг.
Кел, булбулжон, сен ҳам сайра,
Таржимонинг бўлай ўзим.
(Нақорат)
Кел, булбулжон, ўзинг ошнам,
Дилдан ёниб куйлайлик жўр.
Тўй-тантана, гўзал оқшом –
Файзи ўзга, бир баҳам кўр.
(Нақорат)
Қавм-қариндош қувонч кунда –
Дийдорлашар, тўй – оромгоҳ.
Аждодларнинг руҳи шунда –
Яйраб-яшнаб ташлар нигоҳ.
(Нақорат)
Гўзал Боғдон – она маскан,
Тўйинг қутлуғ, тўйхона бўл.
Ўғлингман-да, сен-ла жон-тан,
Мадҳинг куйлай, куйхона бўл.
(Нақорат)
Боғдон, Ўртақишлоқ.
2005-07-22


ҚЎШИҚЛАРИМ – СИЗГА АРМУҒОН
(Ўқитувчилар ва мураббийлар куни муносабати билан)

Бугун байрам, шодлик онида –

Табриклайман, қўлимда созим.
Қўшиқ – куйчи армуғони-да,
Қалб тилагин у билан ёздим.

Мақтовлардан турасиз баланд,

Сабаб: мурғак қалбда бир олам –
Яратиб сўнг, бўлгансиз пайванд,
Умр бўйи бирга ва ҳамдам.

Толе кулса, ўша толе – сиз,

Боқий умр гаштини суринг.
Майли, кулсин бахт эгиз-эгиз,
Майли, олам тургинча туринг.

Сизга дилда доим эҳтиром,

Куй куйласам, сизгадир инъом.
2006-10-01
КЕЛ, ТИНГЛА, ЎҚУВЧИМ

Доимо соғинчим – ўқувчим,

Ҳаётим қувончи – китобхон.
Сен билан хаёлим, бор кучим –
Сен борсан, яшайман мен омон.

Ҳузуринг тилайман, мен чанқоқ,

Озгина бўл ҳамдам, дам берай.
Меҳрни улашмоқ минг қийноқ –
Кутдингми, даврага мен борай.

Висолда яйрасанг, кулсанг-чи,

Яйрайин, минг чандон кулайин.
Дард чекма, дард чекар бўлсанг-чи!
Яхшиси, мен минг бор ўлайин.

Кел, тингла, ўқувчим – ҳамдамим,

Сен борсан, ҳеч қачон йўқ ғамим.