O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Mavzu boʻyicha xulosalar

Mazkur mavzuni oʻrganishda oʻquvchilar hukm, ajrim va qarorlarning qonuniyligi, asosliligi hamda adolatligini tekshirish tushunchasi, uning odil sudlov maqsadlariga erishishdagi ahamiyatini tushunib yetishlari shart. Mazkur institutning barcha bosqichlariga tegishli boʻlgan umumiy qoidalarni farqlash va ularni har bir bosqichga nisbatan tatbiq etish koʻnikmalarini shakllantirishlari lozim.

Muammoli savollar va kazuslar

1. Apellyatsiya instansiyasi sudida ish yuritishning oʻziga xos xususiyatlari nimalardan iborat?
2. Hukm ustidan qay tartibda shikoyat va protest keltiriladi?
3. Apellyatsiya tartibida ish koʻrish tartibini bayon qiling?
4. Apellyatsiya sudining vakolatlarini tahlil eting?


Kazus
Oʻzbekiston Respublikasi Jinoyat kodeksining 97-moddasi 2-qismi “a” bandi bilan sudlangan S.Abramov birinchi instansiya sudi hukmi yuzasidan apellyatsiya shikoyati keltirib, apellyatsiya instansiyasi sudi majlisida ishtirok etish istagini bildirgan. Birinchi instansiya sudi ishning apellyatsiya instansiya sudida koʻrilishining 15-martga tayinlagan. 15-mart kuni S.Abramov apellyatsiya instansiyasi sudi majlisiga olib kelinmasdan, sudga tergov hibsxonasi ma’muriyati tomonidan S.Abramov yuqumli kasallik bilan kasallanganligi tufayli 40 kun davomida davolanishi haqida ma’lumotnoma taqdim etildi.
Apellyatsiya instansiyasi sudi qanday qaror qabul qilishi lozim?

XXIX BOB. HUKM, AJRIM, QARORLARNI IJRO ETISH

(Muallif – yuridik fanlar nomzodi S.Saxaddinov)


Annotatsiya: ushbu mavzuning oʻzlashtirilishi oʻquvchilarda jinoyat ishlari boʻyicha sudlarning hujjatlari hisoblanadigan hukm, ajrim va qarorlarni ijro etish toʻgʻrisida tushuncha hosil qiladi, jinoyat ishlari boʻyicha sudlarning hujjatlarini ijro etish bosqichlarini oʻrgatadi, jinoyat ishlari boʻyicha sudlarning hujjatlarini ijro etishda yuzaga keladigan masalalar va ularni hal qilish tartibi toʻgʻrisida tasavvurlarini shakllantiradi.