O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

3. Mahkumni amnistiya aktiga asosan jazodan ozod qilish. Mahkumni amnistiya aktiga asosan asosiy va ijro etilmagan qoʻshimcha jazodan toʻliq yoki qisman ozod qilish yoxud jazo muddatidan ilgari shartli ravishda ozod qilish yoki unga tayinlangan jazoning oʻtalmay qolgan qismini engilroq jazo bilan almashtirish prokurorning iltimosnomasiga binoan mahkumning jazoni oʻtash joyidagi jinoyat ishlari boʻyicha tuman (shahar) sudining, okrug, hududiy harbiy sudning sudyasi tomonidan amalga oshiriladi.

Mavzu boʻyicha xulosalar

Hukm, ajrim, qarorlarni ijro etish jinoyat protsessining oʻziga xos xususiyatlarga, subyektiv tarkibga, yuridik asoslariga ega boʻlgan bosqichi hisoblanadi. Hukm, ajrim, qarorlarni ijro etish jinoyat protsessida muhim ahamiyatga ega boʻlgan masalalardan biri boʻlib, ushbu mavzuni toʻliq oʻzlashtirish uchun oʻquvchilar JPKning tegishli normalarini, qonunosti normativ-huquqiy hujjatlarni hamda mavzuni yoritish doirasida qayd etilgan tegishli Oliy Sud Plenumi qarorlarini atroflicha oʻrganishlari lozim.

Muammoli savollar va kazuslar

1. Hukm, ajrim va qarorni ijro ettirishning jinoyat protsessual bosqich sifatidagi tushunchasi, xususiyatlari va ahamiyatini koʻrsatib bering.
2. Kimlar sud majlisi zalida qamoqdan darhol ozod etiladi?
3. Sud hukmi, ajrimi va qarori qachon qonuniy kuchga kirgan hisoblanadi?
4. Hukmni, ajrimni va qarorni ijro ettirish tartibi qanday?
Kazus
8 yil muddatga ozodlikdan mahrum etish tariqasidagi jazoni oʻtash jarayonida mahkum ogʻir shakldagi gepatit bilan kasallanib qoldi va shu munosabat bilan jazoni umumiy tartibli koloniyada oʻtash maqsadga muvofiq boʻlmay qoldi.
Shaxsni uning kasalligi tufayli jazoni oʻtashdan ozod qilish tartibi va asoslari qanday? Ushbu masala qaysi sud tomonidan koʻrib chiqilishi lozim?
XXX BOB. ALOHIDA TOIFADAGI JINOYAT ISHLARINI YURITISH
(Muallif – yuridik fanlar nomzodi S.Saxaddinov)


Annotatsiya: ushbu mavzuning oʻzlashtirilishi oʻquvchilarda alohida toifadagi jinoyat ishlarini yuritish tushunchasi va tizimi toʻgʻrisida tushuncha hosil qiladi, voyaga yetmaganlarning jinoyatlari, tibbiy yoʻsindagi majburlov choralarini qoʻllash, yarashuv, ishni sudga qadar yuritish bosqichida amnistiya aktini qoʻllash toʻgʻrisidagi ishlarni yuritish tartibi va oʻziga xos xususiyatlari xususida tasavvurlarini shakllantiradi.